Online Reporter
Nkosilathi Sibanda
NGOLWESIHLANU kuzabe kulomdlalo omkhulu enkundleni yeMoses Mabhida, eThekwini lapho amaWarriors azahlasela khona iBafana Bafana kumdlalo we2026 Fifa World Cup Qualifier kuGroup C.
Umdlalo ungehola lesithupha ntambama. Iqeda kudlala leSouth Africa, iZimbabwe izadibana leLesotho kodwa imidlalo le kayisela sisindo ngoba amaWarriors ehluleke ukuthola imiklomelo eyayizabaluleka ekuthini afinyelele kunkezo yomhlaba.
Umqeqetshi uMichael Nees uthatha imidlalo le njengamalungiselelo akhe omqhudelwano we-Afcon ezabe iseMorroco ekupheleni komnyaka.
Kubadlali abakhethwe eDurban, uNees uzathembela kwabakhulu abagoqela uKnowledge Musona osebike indaba yokuthi ufuna ukujabulisa ababukeli eMoses Mabhida.
UMusona uyazi kuhle inkundla yeMoses Mabhida ngoba wake watshibilika kuyo esadlalela iKaizer Chiefs lapho azakhela khona udumo.
NgoLwesithathu, umdlali lo utshele intatheli ukuthi ufuna ukubakhumbuza kudala kwakhe.
“Ngifuna ukwethula umdlalo omuhle, ozatshiya abalandeli bejabulile. Sengike ngadlala eSouth Africa, ngakho ngifuna ukutshiya bekhuluma ngomdlalo wami.
“Ngifuna ukubatshiya bengikhumbula. Abantu bayangazi ngendlela engidlale ngayo kuKaizer Chiefs, ngakho ngifuna ukutshiya umbono ofanayo.”
Kusenjalo, umqeqetshi weSouth Africa uHugo Broos, ukhethe abadlali akholwa ukuthi bazakwazi ukumenzela lokhu okudingwa liqembu emidlalweni emibili yokucina.
IBafana izathi iqeda ukubhekana leZimbabwe, iyedlala leRwanda eMbombela Stadium, mhlaka 14 Mfumfu.
IBafana idinga ukunqoba kuyomibili imidlalo ukuze izibeke ethubeni elihle lokuthola itikiti lokuya kunkezo yomhlaba ezadlalelwa e-United States, Canada laseMexico ngomnyaka ozayo.
“Ukuze unqobe imidlalo kumele uhlohle. Abadlali esilabo eqenjini sibakhethe ngoba siyabadinga, yibo abakwazi ukuhlohla amabhola. Laba abafana baqinile ekuhlaseleni, okuyinto esiyidinga kakhulu,” kutsho uBroos.
“Loba kunjalo, akumelanga sikhohlwe ukuthi kufanele simake kahle, sivale lasemuva.”
Kubadlali ababiziweyo kubalwa owePirates wasesiswini otshisayo kulezinsuku, uTshepang Moremi.
UBroos, othethe intambo kuBafana ngo-2021, uthe bekungelula ukunciphisa iqembu.
Iqembu leZimbabwe:
Onozinti: Washington Arubi, Elvis Chipezeze, Martin Mapisa.
Imvimbi: Gerald Takwara, Munashe Garan’anga, Teenage Hadebe, Brendan Galloway, Emmanuel Jalai, Godknows Murwira, Jordan Zemura, Divine Lunga.
Abasesiswini: Marvelous Nakamba, Jonah Fabisch, Marshall Munetsi, Tawanda Chirewa, Knowledge Musona, Khama Billiat, Bill Antonio,
Abagadli: Tawanda Maswanhise, Tawanda Maswanhise, Walter Musona, Prince Dube, Thando Ngwenya.
IBafana Bafana:
Onozinti: Ronwen Williams, Ricardo Goss, Sipho Chaine
Imvimbi: Malibongwe Khoza, Khuliso Mudau, Aubrey Modiba, Khulumani Ndamane, Mbekezeli Mbokazi, Thabang Matuludi, Samukelo Kabini, Nkosinathi Sibisi.
Abasesiswini: Teboho Mokoena, Sphephelo Sithole, Bathusi Aubaas, Thalente Mbatha.
Abagadli: Thapelo Morena, Oswin Appollis, Sipho Mbule, Iqraam Rayners, Lyle Foster, Tshepang Moremi, Mohau Nkota, Relebohile Mofokeng.
