Online Reporter
NGOMNYAKA ophelileyo kwathi kufika inyanga kaMpandula akulamuntu owayelethemba ukuthi izulu lizakuna ngoba iganga lonke lalinuka izifuyo ezifileyo ngokucuba.
Kwakusifa ngitsho lezisemapulazini lapho eziphiwa khona ukudla, abafuyi basebesangene bengazi lokuthi babambe kuphi bayekele kuphi.
Kwathi ekupheleni kukaMpalakazi lawohloka izulu kwagcwala imifula lamadamu sibi samaxhaphozi, wonke umuntu wabamatasatasa elungiselela ukulima ababelenhlanyelo bahle bangena baqala ukulima.
Zabukeka izilimo kusiza kunyanga kaNhlolanja, abantu bathemba ukuthi bazavuna njalo bavuthise, phela ukugcwala kweziphala kuxotsha indlala. Iganga lalo latshintsha kwaba luhlaza izihlahla lotshani kwahluma bakhula baba bukhulu inkomo sezisidla emafusini, abafana bengasazelusi ntambama baqonde emadlelweni bayezibutha zingene ezibayeni.
Izulu alizange lime kangako, ukuna lana kusukela kuZibandlela, izilimo ezinengi zatota zaphenduka zaba lithanga bakhala ngokuthi ngabe uHulumende ubanike ifethilayiza bahaza kuzilimo zabo, mhlawumbe kwakuzakuba lobubelo ngoba bona bengenelisi ukuyithenga.
Khathesi bekumele ngabe abantu sebevuna kodwa ngobunengi abaseyi kuvuna lutho ngoba izulu lasuka laba linengi endaweni ezinengi njalo lisona likhukhula amabholoho, lamasimu lemigwaqo yagebheka okwabangela ukuthi kungahambeki endaweni ezinengi.
Labanye abantu bahlangana lengozi yokuthathwa ngamanzi ngenxa yobunengi bezulu, kuze kwazwakala elinye ikhehla lisithi indlala yamanzi ingcono kuleyokuswela amanzi, nanku phela izifuyo azikukhulumi lonyaka, utshani bunengi okwamagama njalo lemifula eminengi lokhe isageleza okukhomba ukuthi azaphelela kwelikude amanzi.
Abantu njengoba bengabantu sebeqalile ukukhalela uHulumende ukuthi abone ukuthi bayaholiswa ukudla ngoba ezigabeni ezinengi bakhala ngendlala.
Bathi umumo wezomnotho yiwo owenza bangenelisi ukuthenga imigodla yempuphu ezitolo ngoba ibiza amadola.
Lemadolobheni lakho yayisingenile indlala ngoba amadamu ayesetshile amanzi esehlupha phela kungaswelakala amanzi emadolobheni kuphileka nzima.
Izambuzi zibamba nki ngephunga kucine sokudala imikhuhlane efana leyesihudo.
Lonyaka amanzi manengi kodwa okokudla kulutshwane sibi sezithelo azizalanga kangako kumbe izihlahla
zalitshaziswa yikuna kwezulu elinengi zakhohlwa ukuthela impoko. Ayixabene.
