Online Reporter
YiNtatheli kaMthunywa
U-ASHLEY Miller, Samukeliso Ndebele loFatima Hassin babe leviki enhle ngokunqoba kumdlalo wokugijima.
UMiller ogijima i400m hurdles utshengise abanye izithende eMelika lapho anqobe khona kusikhathi se-56,07 seconds.
Lesi sikhathi nxa sikhangelwa kumhlaba wonke jikelele seqanjwe kunombolo yesi-24 kwezigijinywe lonyaka. Kumncintiswano wakhe wokuqala awugijime ngoMgqibelo odluleyo, kulethemba ukuthi kule elandelayo uzenza ngcono mhlawumbe afike kubanga le 54,07 seconds. Isikhathi lesi singenza kubelula ukuthi ayencintisa lezinye intshantshu eTokyo kweleJapan, kumaWorld Championships.
UMiller useke wamela ilizwe kumidlalo yamaAfrican Games lapho athola khona imendulo yethusi.
UNdebele ubika ukuba eFrancistown, eBotswana elungiselela, ezilolonga kumphathisile. Wenelise ukugijima i-100m nge-11,78 seconds, okungabe kubeyisikhathi esithembisayo. Usele lengqobe yokuthi azame ukusehlisa isikhathi sakhe siyeku-11,07 seconds, okumupha itikiti lokuya eJapan.
Usebeyintshantshu yeZimbabwe okweminyaka embalwa ku-100 laku-200m njalo ukhangelelwe ukuthi ekuphendukeni kwakhe uzazibutha imendulo kumncintiswano wePayne-Mdhlongwa lowe-Inter-Provincial Championships kunyanga ezizayo.
Kumango we-42,2km uFatima Hassin oleminyaka eyi58 ubengowesithathu eFrancistown ngeSonto edluleyo, lapho aphenduke isamba siqumbile eleP 3 000 yakhe.
UMudiwa Nyirenda uthe iqembu labo leFitness First Athletics Club lilokujabula ukuthi libe labagijimayo abanqobe bafika lapho okulemvuzo yemali.
“Thina nje singabakhwabitha ukugijima, sigijimela impilakahle. Lokhu kubeyinto enhle ukuthi sibelomunye wethu owenze kuhle. Sithi halala kuFatima. Silabesilisa njalo abenze kuhle banqoba eBotswana; uMisheck Matanhire, Marvlelous Masango loVincent Moyo abaphume kwabathathu abaphezu kweminyaka engu-50 yokuzalwa,” kutsho uNyirenda.
