admin
Thokozile Mbedzi
ZEHLISE amaphika izakhamizi zesabelweni seMatabeleland South ezivela endaweni ezehlukeneyo ezacatshelwa yizifuyo ngoLwesithathu kuviki edluleyo kulandela ukumenywa kwazo ngamapholisa eShanyawugwe ukuthi zizokhangela izifuyo zazo ezacatshayo.
Izakhamizi zesabelweni lesi besezithwele nzima ngokucatshelwa yizifuyo zazo zithi nxa zilandela umzila wazo uqonde eShanyawugwe lapho akade bethi nxa besiyafika khona zihlaselwe.
Kubikwa kulezakhamizi ezimbalwa ezahlaselwa ngamasela la kunye lamapholisa okuyikho okwenza kwaze kwabuya amapholisa ahamba ngamabhiza kunye lalezinja ukuzochwayisisa ngodaba lokutshontshwa kwezifuyo lolu.
Ekhuluma lentatheli kaMthunywa uInspector Loveness Mangena uthe amapholisa athethe inyathelo leli ngemva kokunanzelela ukuthi izephulamthetho lezi besezintele kakhulu.
“Sithethe isinqumo lesi ngemva kokuba sesinanzelele ukuthi izephula mthetho lezi bezingasahloniphi izakhamizi ezisuka kwezinye indawo nanko bezithi nxa zingafika kule indawo zilandela umzila wezifuyo zazo zihlaselwe.
“Izakhamizi bezithi loba zingazibona izifuyo zazo zihlaselwe ngamahloka, amabhemba kunye lenduku ngamasela la obekucina kusenza zibaleke zitshiye izifuyo zazo.
“Ngenxa yesizatho lesi sacina sihambisa amapholisa ahamba ngamabhiza, lalezinja ukuze siqede ubusela bezifuyo lobu,” kuchaza uInsp Mangena.
“Zikhona izakhamizi ezazicatshelwe zinkomo zazo ezazitholayo kukanti kulezinye ezilokhu zisagciniwe ezingakabi labanikazi.
“Njengamapholisa sithanda ukukhuthaza uzulu ukuthi afake umtshiso lo osukhona owalezinsuku olakho ukulandeleleka ukuze abafuyi bengalahlekelwa yizifuyo zabo.
“Okunye njalo sithanda ukwazisa uzulu ukuthi ukhululekile ukwazisa amapholisa ngakho konke abona kungahambi kuhle ezigabeni ngezifuyo njalo abantu kababambane balwisane lobusela lobu,” kuphetha uInsp Mangena.
Online Reporter