admin
Thokozile Mbedzi
INHLANGANISO yeAgritex ikhuthaze uzulu endaweni ezehlukeneyo ukuthi alime ikhabitshi kungakhathalekile ukuthi kusemayadini abo loba ezivandeni ezinkulu ukuze bathole isitshebo.
Ekhuluma lentatheli kumbukiso weZimbabwe International Trade Fair osanda kwedlula uNkosazana Treggy Mpofu uthe abalimi kabalime loba emayadini abo ikhabitshi ukuze baphathiseke ngokudla okuqakathekileyo emizimbeni yabo.
“Abalimi kabalime ikhabitshi loba emayadini abo ukuze bathole ukudla okwakha umzimba njalo lokhu sikukhuthaza sihlose ukuthuthukisa ezokulima ngoba kwenza uzulu avuleke amehlo abone ukuba ukulima kuqakathelile kakhulu.
“Sikhuthaza abalimi ukuba indawo yona leyo abalayo kabayisebenzise, thina sikhona ukubapha lonke usekelo njalo inhlanganiso yethu ifisa ukuphathisa abalimi ngohlelo lolu lokugejwa kwezibholani abantu bathole ukuthelela, bangaba ngamaqembu loba umuntu eyedwa konke kuqondile.
“Imikambo ikhona nxa abalimi bengalima kube kunengi bayancediswa ukuthi bangathengisela ngaphi izilimo zabo. Ngesizatho lesi abalimi siyabafundisa njengabalimisi ngokulima ikhabitshi ngoba sifuna ukuba ilizwe lithuthuke kwezokulima.
“Khathesi inhlanganiso isekela kakhulu labo abalimayo emayadini kunye lezivandeni akula otshiywa phandle, wonke umlimi uqakathekile kithi. Ngikhuluma nje sikhuthaza abalimi ukuba kabaxhumane lathi kundawana zabo lapho abakhona siphathisane abalendawo ezilingeneyo loba ezinkulu. Ikhabitshi iyikudla okusetshenziswa ngendlela ezinengi ngakho iqakathekile,” kuphetha uNkszn Mpofu.
Online Reporter