admin
Cornelius Luphahla
AKUBIZWA ozwayo emkhosini we-Intwasa Festival oqhutshwa edolobheni lakoBulawayo ngenhloso yokuphakamisa ezokuthokozisa, umphakathi kanye lokuvuselela ezamasiko kuleli.
Umkhosi lo uqale ukuqhutshwa mhlaka 26 Mpandula uzaze uyephela mhlaka 30 Mpandula.
Emkhosini lo kuzabe kulabaculi abanengi abehlukeneyo njalo kuzabe kulesikhathi okuyabe kungenwa khona mahala kuthi kwezinye indawo kubhadalwe imali.
UMthunywa ukhulumisane loMarkerting and Publicity Manager wenhlanganiso ye-Intwasa Festival uNkululeko Nkala wathi umkhosi lo uzabe uqala ekuseni kuze kuyetshona ilanga njalo ukhuthaza uzulu ukuthi aphatheke emkhosini lo.
“Umkhosi lo uzabe uqala ekuseni uze uyephela ebusuku kusiya ngokuthi mhlanokho kulawaphi amaartists.
Thina njengenhlanganiso yamaArts sikhuthaza uzulu ukuthi aphatheke emkhosini lo engawuthatheli phansi ngoba uqukethe indaba ezimnandi.
Kuqakathekile ukuthi abantu bakithi basekele amaartists akuleli ngoba lawo ayakwazi ukuthokozisa umphakathi njengabangaphandle. Ngalokhu nxa abantu bephatheka emkhosini lo kuzaphakamisa ama artist akuleli.
“Okunye njalo lonyaka emkhosini lo silemihlobo yonke yeArt okuchaza ukuthi umkhosi wethu lo uhlelwe ngendlela ephakameyo kuleminyaka yonke.
“Lokhu kuchaza ukuthi abazaphatheka emkhosini lo bazafunda okunengi ngoba lonyaka kukhulu okwenzakala emkhosini lo,” kutsho uNkululeko Nkala.
UMqondisi we Intwasa Festival uRaisedon Baya uchaze ukuthi umkhosi lo uhlose ukuthuthukisa amaartist akuleli kanye lokuthi asebenze ndawonye.
“Umkhosi lo okunye ujonge ukukhuthaza amaartist akuleli ukuthi asebenze ndawonye okuyikho okuzawenza aphume lemibono eminengi ebanzi engawathuthukisa kwezokuthokozisa uzulu.
“Lathi njengenkokheli zale inhlanganiso siyabancedisa ngokubafundisa ngokunye okudingeka ukuthi bakwenze njengama artist ukuze bajabulise abantu.
“Ngalokhu sikhuthaza abantu ukuthi babuye bazozibonela bengaze bahlala besizwa ngendaba ngoba okwalonyaka kukhulu,” kuphetha uRaisedom Baya.
Online Reporter