adminCornelius Luphahla
LIZIDLA amathambo engqondo inina lesigabeni seDibudibu eTsholotsho ngenxa yomntanalo osethwele nzima ngenyoka ayibona ukusa kwamalanga njalo kwezinye izikhathi iyamhlasela.
Kubikwa umfanyana lo oleminyaka engu-13 useleminyaka emithathu ehlutshwa yinyoka le ebizwa ngokuthi yinhlangano.
Unina walumfana uNkosazana Nomusa Moyo uveze ukuthi usekhathele ngenyoka le njalo ubona angathi kulomuntu olesandla empilweni esiphilwa ngumntanakhe ngoba isimthwalise nzima njalo kwezinye izikhathi iyamluma.
“Inyoka le yaqala ngokuluma umntanami ekuGiredi 4, ngemva kwalokho waqala ukuthi uphupha eyibona. Isimanga yikuthi kumnyaka ophelileyo uqale ukuthi sehlala eyibona noma kusebusika kukanti inyoka le ivame ngesikhathi sezulu.
“Kunyanga ephelileyo umntanami ubuye evuvuke unyawo ethi inyoka le imlumile yabaleka. Samelapha sathi mhlawumbe yinyoka nje yomdabu kanti khona sizapika sigqoke ezethu.
“Iviki ingakapheli yaphinda njalo yamluma. Kusukela lapho iviki kayipheli inyoka le ingamlumanga sengize ngisithi kungcono atshone ekhaya mhlawumbe engaphumula ngoba semabavubavu unyawo lonke njengoba imluma unyawo lunye,” kutsho uNkszn Moyo.
UNkszn Moyo uqhubeke njalo walandisa ukuthi abantu bambangisa inkomo alazo yikho bethumela umntanakhe inyoka.
“Ngokubona kwami izihlobo zomkami zingibangisa inkomo engazitshiyelwa ngumkami ngakho bananzelela ukuthi umntanami lo nguye yedwa umfana mhlawumbe yikho befuna ukumbulala ngoba befuna inkomo,” kuveza uNkszn Moyo.
Ekhuluma loMthunywa uMnumzana Melusi Ncube ongesinye sezihlobo zomkaMaMoyo ubikele intatheli ukuthi indaba le uyake ayizwe laye.
“Indaba yomntakamnewethu ohlala elunywa yinyoka ngiyayazi kodwa angilamandla okuyikhuluma ngoba sokungani thina silesandla kuyo. Isimanga yikuthi asazi lutho ngakho kusuka kube nzima ukuthi uyezwisisa ngokulunywa komntwana ngoba kuzathiwa subuya lenyoka kumbe okunye njalo,” kutsho uMnu Ncube.
Usobhuku wakule indawo uMnumzana Mitsho Ndlovu ubikele uMthunywa ukuba indaba le laye seyizwile.
“Indaba le sengiyizwile kodwa angazi ukuthi sebeyimise njani njalo angikezwa kuhle ukuthi inyoka le ngekabani ukuze abotshiswe ngoba uhlukuluza umntwana,” kutsho uSobhuku uNdlovu.
Online Reporter