adminEthel Ncube
NGENXA yomhawu kulemuli yeSwathi eBubi ethunyelwe isavunguzane ngesinye isakhamuzi sathatha izindlu ezimbili ngemva kokuxabana esibholaneni kubangwa ukuthi omunye uzenza induna.
Isiga lesi senzakale ngenyanga ephelileyo emzini kaThemba Ncube.
Kuzwakale ukuba ngalelolanga uNcube waxabana lenina elaziwa ngokuthi nguSithabile Mkhwananzi esibholaneni lisithi uzenza induna ngokukha amanzi ngemota, ngemva kwalokho izindlu zakhe zathathwa yisavunguzane.
UMthunywa uzwe ukuthi uNkosazana Mkhwananzi ulesandla ekufikeni kwesavunguzane emzini kaNcube ngoba wamtshela ngokuhamba ngemota esiyakukha amanzi esibholaneni.
Intatheli ikhulumisane lesinye isakhamuzi esifakaze ukuthi sasikhona uMnu Ncube ethethiswa nguNkszn Mkhwananzi.
“Angazi ukuthi lumama wayefunani kulo ubaba, ngidinga ngiswele ngoba wamane wamsukela ukuthi ubuyelani ngemota wamtshela inhlamba ezesabekayo abantu belalele esibholaneni, ” kutsho uMnu Ncube.
Kuzwakale njalo ukuthi uMnu Ncube esevelelwe ngumonakalo uNkszn Mkhwananzi kazange azihluphe ngokuyamkhalela.
UMthunywa uxhumane lesinye isakhamuzi esithande ukwaziwa ngokuthi nguMnumzana Dube nje kuphela oveze ukuthi uNkszn Mkhwananzi kazange akhethe ngitsho amabala.
“Umama lo wathethisa uMnu Ncube ngenhlamba ezingeke zakhulunywa ebantwini wamtshela ngesitho sangasese ngoba emphendule wathi kaphilanga kuhle engqondweni andubana athi uzabona.
“Kuthe ngelanga elilandelayo sezwa ukuthi koNcube kube lesivunguzane esiphakamise amazenge ezindlu ezimbili andubana aqonde kuye ayemtshaya. Mina lokhu ngazibonela ngawami amehlo ngisedlula yikho nje indaba le yaze yahanjiswa kusobhuku,” kutsho uMnu Dube.
Intatheli ixhumane loMnu Ncube oveze ukuthi yena watshelwa amazwi abuhlungu.
“UMaMkhwananzi wangithethisa ngenhlamba engingeke ngakutshela zona kodwa okusalayo yikuthi wanginqunula ebantwini njalo wathi ngiyambuluza ngizenza induna kungani ngisikha amanzi ngemota andubana angifungele ukuthi ngizakwehlelwa ngamashwa.
“Lakanye amazwi akhe agcwaliseka ngoba kwathutsha isavunguzane esabuya siqonde kimi mina ngabaleka sayaphakamisa uphahla olwabuya lwangitshaya enyaweni.
“Izakhamizi zonke zabuya zangikhalela kodwa yena kazange alugxobe. Isavunguzane lesi lokhe ngathwetshulwa yingwe ngiyaqala ukusibona. Indaba le yahanjiswa kusobhuku lapho eyathoniswa khona,” kutsho uMnu Ncube.
UMthunywa ukhulumisane loSobhuku uJifi Ncube owathonisa icala likaNkszn Mkhwananzi loMnu Ncube oveze ukuthi indaba le yafika enkundleni yakhe.
“Udaba lukaNkszn Mkhwananzi lwafika kimi laye wavuma ukuthi umthethisile uNcube lokuthi kazange ayefika ngemva kokwehlelwa yingozi yesavunguzane njalo yena uveze ukuthi wacaphulwa yikuthi waphendulwa kwathiwa kaphilanga kuhle engqondweni.
UMnu Ncube wachaza ukuthi wethuka ngoba amazwi ayekhulunywe nguNkszn Mkhwananzi alandelwa yisavunguzane emuva.
UMaMkhwananzi wahlawuliswa imali engange$100 yokuxolisa uMnu Ncube.
Imizamo yokukhulumisana loNkszn Mkhwananzi yehlule.
Online Reporter