Online Reporter
Brandon Moyo
ABAQEQETSHI bamaqembu e-Old Miltonians leMatabeleland Warriors babika ukuthi basuthisekile ngomdlalo owethulwe ngabadlali babo mhla zombili zidibana kumdlalo we2025 Bulawayo Metropolitan Rugby Football Board (BMRFB) Archer Clothing Rugby League.
Umdlalo lo ubungempelaviki edluleyo eHartsfields. Uphele kungutshiki lobhanqa ka 28-28. Amaqembu la azingqwele kumdlalo we-rugby koBulawayo kodwa ngemva kwalumdlalo, abalandeli bayazibuza ukuthi yiliphi elidlala ngcono kulelinye.
Pho yiphi ezaphetha isizini yalonyaka iyingwele yomdlalo.
Kumdlalo lo, i-Old Miltonians ikhuthe umbekwa obungayehlukanisa amaqembu womabili, iphume ingephezulu.
Lawo amaWarriors avoxe udaka, ekhutha i-try ekade izabanika imiklomelo emibili iphelele.
Umqeqetshi wayo uParadzai Matsika laye uthe umangele ngokubona ithalenta kumaqembu womabili.
Bekungumdlalo omuhle. Kube lamaphutha kodwa kuyatholakala emdlalweni onje.
Bekumele sinqobe.
Ngeke ngitsho okunengi ngaphandle kokuthi bekumnandi ukubukela ithalenta lokuzinikela kwabadlali.”
Okhuza iMatabeleland Warriors, uGilbert Nyamustamba uthe impumela itshengise ukuthi abadlali kumaqembu womabili bebehlose ukunqoba.
“Kutshengise ukuthi wonke amaqembu ebehlose ukunqoba. Nxa singathola imidlalo enjenga le, kungasiza abadlali bethu kweminye imncintiswano ephezulu.
Ngiyajabula ngempumela yomdlalo.”
Kweminye imidlalo, iWestern Suburbs Panthers inqobe iBulldogs 57-21, Mahogany Bulls itshaye iHighlanders 28-3.
Kwabesifazane, amaWarriors anqobe iHighlanders 21-0, iPanthers ikhulele iBulldogs nge 20-5.
Okwakhathesi iPanthers ilemiklomelo engu-32, ikhokhela kulogu, ilandelwa yiHighlanders elemiklomelo engu-18.
IPanthers ngeyesithathu (17), leBulldogs iyalandela iphethe imiklomelo efanayo, zisehlukaniswa yi-score difference.
Emsileni kuleLions, elemiklomelo engu-12.
