admin
Nkosilathi Sibanda
UMQONDISI wenhlanganiso ephezulu ebona ngezokuqhutshwa kwemidlalo uCharles Nemachena uthe inkokheli zemidlalo kumele zekele ubumbulu ziqale ukulandela izinqumo lemiyalo yeSports and Recreation Commission.
UNemachena uthe sebekhathele ngokudonsela muva okwenziwa ngezinye inhlanganiso zemidlalo kuleli.
Inhlanganiso ezinengi kubikwa azifuni ukubhadala imali njengokuphawulwa komthetho wezemidlalo ngaphansi kweSRC.
Ekhuluma eceleni komhlangano obuthanise inkokheli zemidlalo kuzwekazi le-Southern Africa, uNemachena uthe akusoze kumangalise ukuthi kumiswe inhlanganiso zemidlalo ezibalisa i-aerobics, iZimbabwe Wrestling Association, iZimbabwe National Bass federation, Polo Association of Zimbabwe, iZimbabwe Bodybuilding and Weightlifting Association, i-juskei, i-baseball le-softball.
Inhlanganiso zemidlalo le kazizange zizihluphe lakancane ukuphawula inhlelo zazo zalonyaka kanye lokuphawula lesimo senkokheli.
Kubikwa amahofisi eSRC aseNational Sports Stadium esigodlweni asehlala evakatshelwa zinkokheli zenhlanganiso lezi zixolisa zincenga ukwamukelwa ngaphansi kweSRC.
UNemachena uthe okwenze baphuma lomqondo wokukhuza lezinhlanganiso yikuthi zehluleka ukulandela umthetho wezemidlalo oweSRC Act (25:15) othi inhlanganiso zemidlalo inye ngayinye kumele ithumele incwadi ekhuluma ngokusebenza kwayo ekupheleni kweminyaka yonke, incwadi etshengisa indleko kanye laleyo evela kubacubunguli bemali ebonisa ukusetshenziswa kwemali.
“Sakhuluma kudala ukuthi inhlanganiso ezingalethanga okufunwa ngumthetho weSRC Act kusigaba 25:15 sizazixotsha, simise lemidlalo.
“Lapha ngikhuluma ngenhlanganiso ezingafika isikhombisa loba nje ezinye zilakho ukuthi sezalandela umthetho.
Inhlanganiso lezi ngezithi iAerobics, iZimbabwe Body Building le weight lifting, i-juskei, i-baseball le-softball, National Bass Federation, i-Polo Association of Zimbabwe, Zimbabwe,” nguNhemachena lo.
Uthe loba kunjalo, inhlanganiso zemidlalo yePolo, i-baseball le-softball zona zilamacala ayehlukeneyo.
“IPolo ingaphansi kwenhlanganiso elandela umthetho eye-Horse Society of Zimbabwe kodwa yona ingalandeli. I-baseball le-softball zona bezisebenza ndawonye, ngenxa yokufuna ukwehlukana sezehlulekile ukuhlonipha.”
Umqondisi weSRC uthe ukumiswa kwenhlanganiso lezi akutsho ukuthi abadlali bengehluleka ukuncintisa phetsheya kwesizwe kodwa bengakwenza lokhu bengasebenzisi ibizo leZimbabwe.
Online Reporter