admin
Cornelius Luphahla
UFELA ebunandini njengomathanditshukela, lesi sitsho sigcwaliseke ngezithandani ezihlala elokitshini leCowdray Park koBulawayo ezihlahlelwe ngehloka zincinda uluju lwemvelo esifuleni zayasilela esibhedlela.
Insumansumane le yenzakale ngoMgqibelo ntambama kuyonale iviki ephelileyo lapho uTooboy Shereni (22) ohlala kukheli ethi 11131 loBongiwe Sibanda ohlala endlini elekheli elithi11228 eCowdray Park abaganyulwe khona lisela besotha umlilo wemvelo esifuleni esikulelokitshi, uMthunywa uyakuveza lokhu namhlanje.
UMthunywa ukhulumisane lesakhamizi sakule indawo uNkosazana Esnat Nkomo ochaze ukuthi izithandani lezi wayehlala ezibona zihamba kulindawo ebusuku njalo uyakwazi ukuthi yizithandani.
“Mina ngiyakwazi ukuthi uTooboy loBongiwe bayathandana ngoba nsukuzonke ngihlala ngibabona ntambama behamba beqonda esifuleni leso okuyilapho abaganyulelwa khona. Ngikhuluma nje kuviki ephelileyo ngihlangane labo futhi ilanga selitshonile bephuma esifuleni lesi.
“Ngokubona kwami amasela lawo abananzelela yikho beze baganyulelwa egangeni leli. UBongiwe watholakala eqalekele egangeni lapho ababelele khona loTooboy,” kutsho uNkzn Nkomo.
Ebuzwa ngale indaba uNkszn Bongiwe Sibanda uveze ukuthi waganyulwa ngethuba evela thatha imali kwesinye isakhamuzi esihlala kulelilokitshi.
“Mina ngangithunywe ngumama ukuyalanda imali yakhe koNaMaphi ngihamba lomngane wami sokuntambama.
Sathi sisendleleni kwathutsha umuntu etshitsha kakhulu samvulela indlela ukuthi adlule wathi eseqondane lathi wagamula umngane wami kanye ekhanda mina ngathi ngizama ukubaleka wangigamula kabili ekhanda.
“Ngemva kwalokho kangibonanga ukuthi kwahamba njani ngazibona sengivuswa ngabanye obaba ababili egangeni. Bangithwalela endlini sahlangana lomngane wami esebuya lodadewethu sebezongidinga. Ngemva kwalokho sathwalwa yi-ambulensi yasisa esibhedlela seMpilo saphenduka ngelanga elilandelayo,” kulandisa uNkzn Bongiwe Sibanda.
UMthunywa wenelise njalo ukukhulumisana loMnu Tooboy Shereni ochaze ukuthi umuntu owabagamulayo kamazi njalo wazibona esevuka kwezinye izindlu angazaziyo.
“Mina ngacina sidlulwa ngumuntu emuva kwethu ngazibona sengivuka eduze lezindlu ezikhatshana langakithi kangazi ukuthi ngafika njani. Ekuvukeni kwami ngakhumbula ukuthi bengihamba lomngane wami noma nje ngasengilimele ngaphenduka ngayamdinga ngahlangana lodadewabo ngathi ngisamlandisela sahle sahlangana laye esehamba labanye obaba.
“Lokhu okokuthi saganyulwa sisemacansini ngamanga ngoba mina loBongiwe singabangane kuphela kasithandani,” kutsho uMnu Shereni.
Kuzwakale ukuthi ngoMvulo kulomunye umama wakule indawo otshaywe kabuhlungu ngamasela kule indawo evela ebhawa. Kusenjalo nje emavikini amabili adluleyo kulomunye umama oganyulwe ngehloka edlula kule indawo evela enkonzweni ntambama.
UNkosazana Lungile Sibanda unina kaBongiwe Sibanda ubikele intatheli ukuthi nguye obethume umntanakhe njalo kabathandani loTooboy.
“Yimi engithume umntanami ukuyangithathela imali njalo umntanami kathandani loTooboy. Isiga lesi sibehlele kuphela kodwa bekungelalutho abalwenzayo egangeni leli. Ngalokhu-ke amapholisa ngiwabikele kodwa isigangi lesi esibagamulileyo kasikabanjwa,” kutsho uNkzn Sibanda.
Imizamo yokukhulumisana lesikhulumi samapholisa edolobheni lakoBulawayo uInspector Precious Simango yehlule ngoba ucingo lwakhe belungadojwanga.
Online Reporter