admin
Nkosilathi Sibanda
KULOKUKHOLWA okukhulu kubhentshi labaqeqetshi beqembu leHwange ukuthi iDynamos izathwala amagabha avuzayo ngeSonto kudibene amathimu womabili enkundleni yeColliery kumdlalo wesihlanu weligi yeCastle.
Lokhu kufaka ingqobe kumqeqetshi weDynamos uPaulo Silva ophiwe umlandu wokuthi anqobe umdlalo lo ngoba kungaba yikutshiya kwakhe umsebenzi.
Imbali yokuhlangana kwamathimu la iveza ukuthi iDynamos ibinqoba nzima enkundleni yeChipangano kumasizini amahlanu adluleyo.
Umqeqetshi weHwange FC uMabelo Njekwa useziphosele amehlo, nanko usebike ngokungesabi ukuthi akayiphumputhi iDynamos.
Kungxoxo abelayo loMthunywa ngoLwesibili uNjekwa uthe: “Yisikhathi sethu lesi sokuthi sidlale ngokuzimisela.
Ithimu yami izaqinela wonke isizini ize iphele. Okwamanje sikhangelane leDynamos. Umdlalo lo sizawubamba okweqiniso sidinga ukuthi sinqobe.”
Akulamuntu ongamsola uNjekwa ngokuzikhukhumeza kwakhe nxa kukhangelisiswa ukudlala kwamathimu la.
Indlela iHwange ephenduke ibukhali ngayo iphaphamise amaqembu akade eyidelela ithimu le.
Kodwa, ngokuhlolisisa umdlalo walithimu kumasizini ambalwa adluleyo, kutholakale ukuthi iHwange ibiqalisa kuhle, iyehluleke isizini isiyaphutsha.
Inkinga zeHwange zijwayele ukuhlasela kusigaba sesibili sesizini. Imbali iveza ukuthi iqembu lilahlekelwa yimiklomelo ngalesikhathi loba liqalise litshisa.
Ebuzwa ngalokhu uNjekwa uthe kulisizini akuphindwa.
“Ungakhumbula ngomnyaka ophelileyo saqalisa kuhle sacina sesiphansi. Kwakulenkinga eqenjini, kulokunengi okwakuhlupha. Khathesi asicabangeli ukuthi kungaba lenkinga enjalo.
“Abadlali bayazi ukuthi ukuwa kwethimu yikuwa kwamabizo abo.”
Iphephandaba likazulu lixoxe lesikhulumi sabasekeli beHwange ababike ukuthi loba ithimu yabo ingakahlangani kuhle, abangeke banqotshwa yiDeMbare.
“IDynamos ayiphumi kithi. Layo iyazi ukuthi nxa idlala leHwange akwandisanga ukuthi inqobe. Kungangcono kube ngutshiki lobhanqa,” kutsho umgcinisihlalo wenhlanganiso yabasekeli beHwange uNicholas Nkomo.
IHwange yilo lodwa iqembu elingazange lizihluphe ngokuthenga abadlali.
Ngokuzwa kukaMthunywa, isizatho yikuthi inkokheli zethimu sezifuna ukuthi kudlale abafana abadabuka esigabeni seHwange kuphela.
Umqeqetshi ucele usekelo lwabalandeli babo wathi sekumele balandele ithimu kumidlalo yabo yonke.
“Lami njengomqeqetshi kuyangikhuthaza ukuthi sithokozise abalandeli bethu. Njengoba sisaqala, ngilethemba lokuba imiklomelo sizayithola kumidlalo yonke. Labasekeli ngicela ukuthi babekezele ngoba iqembu ngelabo.”
Online Reporter