admin
Johas Moyo
NGEMVA kweminyaka engu-29 etshaya amathambo uSelina Mfune ohlala elokitshini leOld Luveve koBulawayo usekhethe ukufulathela amadlozi alandele ukholo lwesiKhristu.
UMfune oleminyaka yokuzalwa engu-58 ubikele uMthunywa ukuthi okumenze watshiyana lezamadlozi yikuthi uselesikhathi eside egula njalo abakibo bembangisa isipho lesi.
Kubikwa endlini kaMfune bekuhlala kuphithizela abantu bengena bephuma nanko phela ubeselapha imikhuhlane ehlula abanengi efana lezathuthwane, imvukuzane, inkanda, ukumisa, ukwethula amathunzi kanye lamadlozi amabi amagidela endlini.
UMfune uxoxe lephephandaba likazulu waveza ukuthi usengena ibandla le-Lord Embassy ngoba esenanzelele ukuthi ubehamba ebunyameni.
Uthe kuliqiniso sibili ukuthi sowatshiya ukuba yisangoma njalo amabhetshu kunye lamathambo ukubekile endlini ngoba eseguqukile.
Uthe okumenze wacabanga ukufulathela amadlozi yikuthi impilo yokuthembela entebeni inzima kakhulu ngoba lezihlobo ziyabe zikulwisa zilifuna idlozi lelo.
“Ngaqalisa ukwelapha ngomnyaka ka1987 okutsho ukuthi besengileminyaka engu-29 ngiselapha njalo ngitshaya amathambo konke lokhu ngikukhokhelelwa ngamadlozi akithi.
Ngangiphutshiswa izihlahla ngabadala nxa ngilele njalo ngangithi ngingavuka ngiyeziphanda lezo zihlahla ngihle ngelaphe ngazo.
“Ukubayisangoma kwenza umuntu enze ezinye izinto ezingalunganga kungakho-ke ngangilamandla amakhulu okokuthi ngangilakho ukuthola ezinye izihlahla zokuganga ngoba ngithanda ukuthi ngisize kakhulu abantu.
“Idlozi leli elalingenza ngisize abantu ukwenza ukuganga okuthile ngangingalithandi ngoba ngagula kakhulu lingingena okwenza ukuthi yiloba sengibona abantu bengasezi ngalilahla ngincediswa ngabantu besonto, lezembatho zobusangoma ngazifaka endlini ngoba sengisindisiwe”, kutsho uNkszn Mfune.
Uthe okunye njalo okwakumkhathaza yikuthi kwezinye izikhathi wayesithi engelapha umuntu lokho okuhlupha lowo muntu kuphume kuye kuzingenele kuye.
“Umsebenzi wokwelapha unzima ngoba kwesinye isikhathi into ehlupha omelaphayo ilakho ukuphuma kuye ingene kuwe.
Ngokunjalo ngagula kakhulu yikho nje sengize nganakana ukuthi ngiphenduke ngilandele uJesu Khristu,” kutsho uNkszn Mfune.
UMthunywa uxhumane loNkosikazi Nora Mhlanga ongumngane kagogo uMfune uchaze ukuthi laye wayeselapha kodwa laye sewekela ngokuhlutshwa ngamadlozi ikakhulu nxa idlozi lithwasa ngoba lihlukuluza umzimba kalo owelaphayo kukanti lidinga izinto ezinengi kanye lendawo yokuhlala engaqedakaliyo.
“Lami ngangiselapha kodwa sengakutshiya lokhu ngoba kunengi okwakungikhathaza.
Ngasengihlutshwe lidlozi lenjuzi elangigulisa kakhulu lifuna ngiyethwasela emanzini okwenza ngicine ngisekela okwamadlozi ngilandela uJesu umsindisi.
“Ngachitha njalo imali enengi ngizama ukulalisa lokho okwakufunwa lidlozi kodwa kwala ngacina sengibona ukuthi kungcono ukungena iSonto ngithole usizo oluvela kuJesu Khristu.
Ngathola usizo olukhulu kubazalwane yikho ngacebisa lomngane wami ukuthi enze okufanayo ngoba idlozi liyingozi”, kutsho uNkszn Mhlanga.
Umakhelwane kagogo uMfune uMnumzana Ndumiso Mlotshwa yena ubike ukuthi isimanga ngalo ugogo yikuthi kuqala abantu babemazi njengomuntu oyisangoma kugidwa amadlozi ngakibo kunguye okhokhelayo kukho lokho khathesi isimanga yikuthi usengena ibandla elingenelwa emzini wakhe.
UGogo uMfune uphethe ngokuthi impilo yakhe isiguqukile ngokuphenduka kwakhe njalo ngeke abuyele emuva.
Online Reporter