Online Reporter
Abel Ndooka
ZIMBABWE Cricket yakadoma chikwata chenyika chemaChevrons icho chichanokwikwidza kumutambo weInternational Cricket Council (ICC) Men’s T20 World Cup 2026 uyo uchatambirwa kuIndia neSri Lanka.
Mutambo weICC Men’s T20 World Cup 2026 uchatanga musi wa7 Kukadzi uchizopera musi wa8 Kurume.
Mitambo iyi ichange ichitambirwa kunhandare dzakasiyana kuIndia neSri Lanka.
Kumutambo weWorld Cup uyu, maChevrons akaiswa muboka reGroup B rine zvikwata zvepamusoro zvecricket zvinoti Australia, Ireland, Sri Lanka uye neOman.
Pachatanga mitambo iyi, zvikwata zviviri muboka rega-rega zvichapedza zviri pamusoro ndizvo zvichazofambira mberi kukwikwidza mumakwishu anozivikanwa nekunzi Super Eight apo zvichange zvave kurwira mukombe weWorld Cup.
Chikwata chemaChevrons chakasarudzwa kuenda kumutambo uyu chichange chichitungamirirwa naSikandar Raza anove kaputeni uye chine vamwe vatambi vanosanganisira Brian Bennett, Tadiwanashe Marumani, Brendan Taylor, Ryan Burl naTashinga Musekiwa.
Mumutambo wekutanga wemaChevrons, achasangana neOman kunhandare yeSinhalese Sports Club Ground kuColombo musi wa9 Kukadzi uye ozosangana neAustralia musi wa13 Kukadzi kunhandare yeR. Premadasa.
Mumutambo wechitatu, chikwata chenyika ichi chichatatsurana neIreland kuPallekele International Cricket Stadium musi wa17 Kukadzi, chozodzoka kuColombo kuzosangana neSri Lanka kuR. Premadasa Stadium musi wa19 Kukadzi.
Chikwata chemaChevrons: Sikandar Raza (kaputeni), Brian Bennett, Ryan Burl, Graeme Cremer, Bradley Evans, Clive Madande, Tinotenda Maposa, Tadiwanashe Marumani, Wellington Masakadza, Tony Munyonga, Tashinga Musekiwa, Blessing Muzarabani, Dion Myers, Richard Ngarava naBrendan Taylor
