Online Reporter
Abel Ndooka
CHIKWATA chenyika chemaChevrons chichasangana necheEngland mumutambo mumwechete wetest match uyo uchatambirwa kuTrent Bridge, kuNottingham.
Mutambo uyu uchatanga musi wa22 uchizopera musi wa25 Chivabvu.
Aka kachange kari kekutanga mushure memakore akawanda maChevrons kunotamba kunyika yeEngland uko akapedzisira kuenda mugore ra2003.
Murairidzi wemaChevrons – Justin Sammons – akadoma chikwata chakasimba chevatambi 15 icho chichanosangana neEngland.
Achaitaura pamusoro pechikwata chake, Sammons anoti: “Tichitaura panhau yamatambiro, tinotarisira kutamba zvemhando yepamusoro apo tichasangana nechimwe chezvikwata zvikuru pasi rese.
“Ndinoda kuti vakomana vafambe ikoko vachizvitemba, vachifarira nguva yacho vachiziva kuti vanogona kurwisana nechikwata chikuru uye vachifarirawo basa ravo.”
Mutambo uyu unotevera wemaChevrons neBangladesh uyo wakaona zvikwata zviviri izvi zvichibandana mumitambo miviri yetest match ikazopera 1-1.
Panopera mutambo uyu, maChevrons achazosangana neSouth Africa kubva musi wa4 kusvika 6 Chikumi kuArundel.
Muchikwata chaSammons, icho achatakura kuenda nacho kuEngland, mune vatambi vanosanganisira Sikandar Raza uyo akadzoka sezvo asina kutamba mumutambo weBangladesh, Clive Madande uyo ari kudzokawo zvichitevera kukuvara kwaainge akamboita naNewman Nyamhuri uyo akatsiva Vincent Masekesa.
Online Reporter