Zimkhalele esanda kuphuma ejele, esetshontse imota

Sources familiar with the matter said the case, recorded under reference CR 188/07/2026, involves two counts of alleged theft of trust funds

Ethel Ncube

KULESELA ebelisanda kuphuma ejele elitshonelwe lilanga kulandela ukubotshwa ngecala lokutshontsha imota kanye lezinye impahla ngeviki ephelileyo eRedcliff.

Amapholisa eMidlands aseveze ukuthi abophe uBenjamin Manyangadze, oleminyaka engu-20, weRuwa osolwa ngecala lokugqekeza kwenye indlu antshontshe imota.

Umetheswacala ubotshwe eMurombedzi Business Centre mhlaka 16 Mbimbitho 2026 ngezikhathi zantambama.

UManyangadze kubikwa ukuthi ubesanda kukhululwa ejele yeMarondera mhlaka 2 Mbimbitho 2026, ngePresidential Amnesty lapho ayebotshelwe amacala ayisithupha okugqekeza lokutshontsha.

Icala leli lenzakale mhlaka 11 Mbimbitho 2026 eRedcliff. Umamangala, uTawanda Godfrey Magure, wathola endlini yakhe kuvuliwe. Imota yakhe yohlobo lwe-Peugeot, imali engange-US$1 800, umakhalekhukhwini weTechno kanye lezinye impahla sekutshontshiwe.

Kucatshangelwa ukuthi umetheswacala wasebenzisa ikhiye ukuvusa imota eyayime phandle wahamba layo.
Kubikwa abacuphi mhlaka 16 Mbimbitho 2026, bananzelela ukuthi imota le yayihamba ngomgwaqo weChinhoyi usiya eChegutu okwenza bazisa amapholisa eMurombedzi, okuyilapho imota eyabanjwa khona eMurombedzi Business Centre.

Umetheswacala watholakala njalo elomakhalekhukhwini.

Kubikwa impahla, umakhalekhukhwini kunye lemota okwakutshontshiwe kwakubiza i-US$9 920, kodwa okwatholakalayo ngokwe US$7 500.

Isikhulumi samapholisa eMidlands uInspector Emmanuel Mahoko uqinisekise ukuthi umsolwa usesezandleni zamapholisa.

“Umetheswacala uzavela phambi komthethwandaba maduze ebhekane lamacala okugqekeza, lokuntshontsha imota, njengokuchazwe kuSection 131 loSection 113 yeCriminal Law (Codification and Reform) Act, Chapter 9:23,” kuphetha uInsp Mahoko.