admin
YiNtatheli kaMthunywa
“Ngesikhathi ikhasi lami le-Facebook ligqekezelwa, ngaphangisa ngathintana leqembu. Angikaze ngibhalele iqembu ngibika ngokuhamba kwami…”
La ngamazwi kakaputeni weqembu le-Highlanders uAriel Sibanda elandula ukuthi wake wathi usetshiya iqembu ngoba alisela mali.
Umdlali lo, ophinda abengunozinti weqembu utshiye intatheli zinkemile ngesikhathi ekhuluma ngaloludaba.
USibanda ubehlezi lomqeqetshi uMandla “Lulu” Mpofu lomdlali uNqobizitha Masuku.
UMasuku ngomunye owaye seyifulathela iBosso ngenyanga kaNcwabakazi, ebalisa ukubulawa yindlala.
Ukulandula kukaAriel lokhu kungabe kumangalisile kodwa bekukhangelelwe nanko phela bonke abadlali beHighlanders sebezahola imali ezwayo kulandela ukuthola usekelo lwemali yenkampani yeSakunda.
Ukaputeni lo waphiwa uvava lwemota evela kulinkampani, okungaba ngesinye isizatho sokuthi azizwe eselenhloni.
Ukulandule u)kuthi nguye owabhala ukuthi usetshiya iqembu, waqina ngokuthi ikhasi lakhe “lalitshontshiwe.”
“Ukhona owatshontsha i-account yami. Ngesikhathi ngibona ukuthi i-account yami itshontshiwe, ngaxhumana leqembu,” kutsho lumdlali osekhomba ngophakathi ngenxa yokuxhaswa yinkampani yeSakunda.
UMasuku kazange achithe isikhathi, uthe ufisa ukwazisa abalandeli beqembu ukuba ngempela wayefuna ukusuka.
“Liyasazi isimo esinzima esasikhangelane laso ngalesi isikhathi. Kuliqiniso ukuthi ngabhalela iqembu ngifuna ukuhamba.”
Kumaviki adluleyo, iBosso isayine izivumelwano ezimbili ezinkulu lenkampani ye-Utande leSakunda.
Online Reporter