admin
KULE iviki iphephandaba likazulu lize loluju lodwa nanku phela liphethe intombi ezimhlophe lamajaha ampofu abangena kunyikinyeke lezihlahla.
Angithi nje leliqembu licula ligide ezamasiko kuphela lona elidabuka kwelePlumtree.
Kawamekezi nje amantombazana la angena kutshise ngezansi kwenkaba zamadoda.
Amajaha akhona angikhulumi angena kudikize enhla kwamadolo amantombazana.
Othanda ukuncinda loluluju lwezamasiko nansi ingxoxo ehlabusayo phakathi komunye walamantombazana aleliqembu uSlyvia Mpofu (SM) lentatheli yephephandaba likazulu uCornelius Luphahla (CL).
CL: Akuchathekele uzulu ntombenhle mayelana lembali yakho kanye leyeqembu lenu?
Mina ngazalwa mhlaka 25 Ntulikazi ngo1989, esigabeni seMakumbi ePlumtree. Ngakhulela khonapha-ke ngayafunda uGiredi 1 eMakumbi Primary ngaze ngayaqeda khona uGiredi 7.
Ngemva kwalokho ngaqhubekela phambili ngezifundo zami ngayangena uFomu 1 eMadlambudzi Secondary ngaze ngayaqeda uFomu 4 khona.
Ngasuka njalo ngayahlala koBulawayo lapho engafundela khona amakhompuyutha kanye lekhosi yeCutting and Designing. Kwathi ngo2010 ngasuka kweleZimbabwe ngayadinga umsebenzi eSouth Africa lapho engisebenza khona lakhathesi.
Ezokucula ngaziqala ngisafunda ePrimary lapho engangicula khona ezesiNtu ngigida njalo imigido yesiNtu noma nje ngangingakaziwa emphakathini.
Iqembu lethu silisungule ngoMbimbitho kuwonalo umnyaka ngilabangane bami ngemva kokunanzelela ukuthi nxa sigida imigido yethu yesiNtu abantu bayayijabulala khakhulu.
CL: Akutsho ntombi ukuthi licula libangaki kuqembu lenu?
SM: Thina kuqembu lethu sicula singamaqembu ayisikhombisa, amantombazana sibahlanu kuthi amajaha mabili. Amalunga la agoqela uSlyvia Mpofu, uNomagugu Mpofu, uQueen Mpofu, uNicky Dube, uLikeli Dube, uEli Nkomo kanye lo Andrew Moyo.
CL: Abantu bathini ngomculo wenu njalo njengeqembu selikhiphe amadlalade amangaki?
SM: Abantu bayawujabulela kakhulu umculo wethu njalo basikhuthaza ukuthi siqhubekele phambili ngomculo wethu singaze sadela noma kunzima. Okunye njalo abantu basicela ukuthi sibavakatshele endaweni ezehlukeneyo ukuze sibajabulisa ngomculo kanye lemigido yethu.
Njengeqembu elisasungula sesikhiphe idlalade elilodwa elithi Ijazi Lejali, esilikhiphe ngoNtulikazi kuyonale inyanga ephelileyo.
CL: Bikela uzulu ukuthi landise ukutshayela ngaphi ingoma zenu njengeqembu?
SM: Ingoma zethu sandise ukuzitshayela kuma-shows, emikhosini etshiyeneyo efana lamadili okuzalwa kanye lakweminye imidlalo. Kwesinye isikhathi siyamenywa emidlalweni efana lemitshado kumbe kweminye imidlalo yamasiko.
CL: Tshela umphakathi tshatshazi ukuthi likhangelele ukuwenzelani lonyaka?
SM: Lonyaka sikhangelele ukuvakatshela endaweni ezehlukeneyo sitshayela abantu ingoma zethu. Okunye njalo sikhangelele ukukhiphela uzulu ividiyo yedlalade lethu esilikhiphileyo ukuze abantu bazibonele ngamehlo ukuthi senza msebenzi bani.
CL: Bunzima bani eselike lahlangana labo njengeqembu elisasungula njalo elisungula umculo ongasavamanga emphakathini?
SM: Ubunzima esihlangana labo yikuthi abanye abantu ikakhulu abakhulele emadolobheni kunzima ukuthi bawuzwisise umculo wethu kudlalade bathi bafuna i-DVD elibiza imali enengi ukuthi silikhiphe. Okunye njalo sihlutshwa yimali yokuzithuthukisa njengeqembu elisasungula.
CL: Nkuthazo bani eliyipha abaculi eliyipha abaculi abasasungula njengani?
SM: Kubaculi abasasungula sikhuthaza ukuthi baqinisele bengadeli ngoba umsebenzi lo unzima. Okunye njalo sibakhuthaza ukuthi babuze kwabanye abakwaziyo ikakhulu ukuze bathole ulwazi lokuzithuthukisa.
Sikhuthaza njalo ukuthi bahloniphe uzulu ukuze bathole abalandeli abanengi ngoba inhlonipho iqakathekile.
Online Reporter