admin
Cornelius Luphahla
AMAQEMBU omculo wesichathamiya azadibana emkhosini weMbube Music Carnival ozakuba khona eBulawayo Theatre lapho amema khona uzulu ukuthi azozibonela ukudla kwamehlo ahlala ekuzwa ngelika bathi.
Umkhosi lo uhlelwe yinhlanganiso yembube iRise Up Chothoza Mfana uzakuba mhlaka 20 Ncwabakazi lapho amaqembu embube adabuka lapha koMthwakazi azajabulisa khona abantu kusukela ngehola lesithupha ntambama kusiya kweletshumi ebusuku.
UMthunywa ukhulumisane loMqhelisi Mnguni ongumabhalane wale inhlanganiso oveze ukuthi okwenze bahlela umkhosi lo yikuthi bafuna ukuphakamisa umculo wesichathamiya kanye lokuhlanganisa amaqembu la.
“Okwenze sasungula umkhosi lo yikuthi sinanzelele ukuthi umculo wesichathamiya ubuphezulu ngenxa yokuthi amaqembu embube ayizolo ayebambene. Ngalokhu-ke sibone kungcono ukuthi sibe lomkhosi wokuhlanganisa amaqembu ethu ukuze sithuthukise umculo wethu.
“Emkhosini lo sizabe silamaqembu embube agoqela iSunduza Dance Theatre, Mpumelelo Shining Stars, Great Stars, Ukukhanya Kwezwe, Man of Influence, Ibutho likaKhristu, Black Tigers kanye lamanye amaqembu atshiyeneyo,” kutsho uMnguni.
Ekhuluma loMthunywa uMqondisi womkhosi lo uOsca Siziba uveze ukuthi kuzabe kuthengiswa am-CD amaqembu wonke la njalo bajonge ukusakaza umculo wabo.
“Emkhosini lo sizabe sithengisa amadlalade ethu kanye lama-DVD akhona kungakhathalekile ukuthi ngawaliphi iqembu. Okunye njalo sizabe sithengisa impahla zokugqoka ezilotshwe amagama amaqembu ethu kungakhathalekile ukuthi yiliphi iqembu.
“Ngalokhu-ke sijonge ukufafaza umculo wethu amazwe wonke kanye lemazweni aphetsheya ukuze siwuvuselele njalo,” kuphetha uMnguni.
Online Reporter