admin
YiNtatheli kaMthunywa
IZAKHAMIZI zesiqintini seMzinyathini zidlela evalweni ngendaba yokuswelakala kwamanzi kunye lotshani endaweni yazo okungabangela ukuthi inkomo zabo zibesengozini yokucuba.
Kuzwakale ukuthi inkomo lezi zigoqela eziku Wadi-3 kunye leziku Wadi-4.
Kubikwa indawo lezi azilamadamu njalo lemifula ekhona kayigcini amanzi.
UMthunywa uxhumane lenduna yakulesisiqinti, uMnumzana Muntonzima Gwebu yabika ukuthi inkomo zakule indawo zisengozini yokucuba ngoba seziqalile ukucongolozela emachibini njalo lonyaka lotshani bulutshwana.
“Lonyaka inkomo zethu zisengozini yokucuba njengoba izulu lingananga kuhle.
“Amanzi lawo awasekho emachibini, inkomo sezicongolozela edakeni ezinye ziyabhalelwa. Abalemigodi sebenathisa emigodini yabo, manje uhlupho yikuthi abanye abalamigodi. Lokhu kudala ukuthi inkomo zabo ziswele lapho ezinganatha khona ziphethe ngokucuba,” kulandisa induna uGwebu.
Induna uGwebu iqhubeke yabika ukuthi okunye okuzadala ukuthi inkomo zakule indawo zicube yikuthi indawo yamadlelo enkomo incane kakhulu kukanti zona zinengi. Utshani obukhona luqunga abudliwa zinkomo kodwa ngobokufulela izindlu kuphela.
UMnumzana Mthabisi Ndlovu omunye wezakhamizi zakule indawo ubikele intatheli ukuthi okuzadala ukuthi inkomo zabo zicube yikuthi azila lapho ezinganatha khona njalo lemifula ekhona iyaphangisa ukucitsha.
“Indawo yakithi ilohlupho lokuswelakala kwamadamu njengoba nje agqibeleka kudala njalo lemifula ekhona iyaphangisa ukucitsha yikho inkomo zethu zicuba ngenxa yendlala yamanzi,” kuchaza uMnu Ndlovu.
Izakhamizi lezi zibuye zabika ukuthi njengoba inkomo zazo zinatha udaka zisevalweni ngoba zingacina zihlaselwa yimikhuhlane efana lamawemusi atholakala esiswini senkomo okungenza zibe sengozini yokulahlekelwa zinkomo zazo.
Kuzwakale ukuthi inengi lezakhamizi seliqalile ukusikela inkomo utshani lizama ukuzivikela endlaleni.
Online Reporter