admin
Ethel Ncube
ZITHABE zimanzi te izakhamizi zeMtshede, eSigodini nanko phela kulandela ukukhitshwa kodaba lodubo lwamanzi ezazibhekane lalo esigabeni lesi kuphephandaba leli sezigejelwe izibholane.
Izakhamizi lezi zazikhala ngokuthi zilesibholane esisodwa obekubangela ukuthi abantu bacine besiyanatha lenkomo emfuleni kukanti abanye abantu bebecina betshona bejamile esibholaneni.
Izakhamizi zakule indawo zaveza njalo ukuthi ziyehluleka lokulima izivande ngenxa yodubo lolu lwamanzi ezazibhekane lalo ngoba lomfula lo ubucitsha.
Lamhlanje izakhamizi lezi zikhomba ngophakathi njengoba sezigejelwe isibholane ngakho sezisenelisa lokulima izivande ukuze ziziphilise.
Iphephandaba likazulu likhulume loSobhuku wakule indawo uMnumzana Roja Mhodi yena obike ukuba baswele imilomo ezinkulungwane yokubonga iphephandaba likazulu kanye lenhlanganiso ezimele yodwa eyabagebhela isibholane lesi.
“Ngithanda ukubonga ngoba isikhalazo sethu sazwakala abanye basukumela phezulu basincedisa ngokusigebhela isibholane. Khathesi asisakukhulumi ngamanzi ngoba aseyintaphani ngikhuluma nje umuzi ngomuzi sulesivande semibhida.
“Angazi lokuthi ngithini ngoba amanzi ayimpilo,” kutsho uMnu Mhodi.
Uqhubekele phambili echaza ukuba khathesi inkomo zabo sezinatha kuhle zodwa emfuleni zingabangiswa muntu,” kulandisa usobhuku uMhondi.
Intatheli ixhumane njalo lesinye isakhamizi seMtshede uSilibaziso Mpofu yena oveze ukuba kabalankani loncedo abalutholileyo.
“Siyathokoza endaweni yethu ngalokho esakwenzelwayo njalo amanzi la kukhanya manengi kawapheli. Lathi njengabomama sesizimisele ukuqala iphurojekithi yokulima imibhida ukuze siziphilise,’’ kuphetha uNkszn Mpofu.
Online Reporter