admin
Cornelius Luphahla
ONTANGA sebakhuthazwa ukuba bangahlali phezulu kwezandla kodwa basebenze gadalala kwezokulima lokufuya ukuze bazithuthukise njalo bathuthukise lelizwe.
Lokhu kuvezwe nguMphathintambo wogatsha lweYouth Indigenisation and Economic Empowerment uKhomuredi uPatrick Zhuwao emkhosini wokuqeqetsha kwabontanga abafundele imisebenzi yezandla kunhlanganiso yeYoung Africa obukhona ngoLwesine kuviki ephelileyo eLupane.
Ekhuluma kulo umkhosi uKhomuredi Zhuwao uchaze ukuthi intsha kubalulekile ukuthi isebenzise umhlaba elawo ukuze yenelise ukuzithuthukisa.
“Bontanga ngithanda ukulikhuthaza lamhlanje ukuthi lilime ukuze lizithuthukise njalo lithuthukise lelizwe lethu.
Ukulima kulenzuzo enhle nxa ungaphumelelanga emabhukwini ulakho ukuthi wenze izimanga kumisebenzi yezandla kungakho nxa uqeqetshe kuzifundo zokulima sebenza ngamandla uziphilise.
“Ngiyazi ukuthi inengi lenu lingakhala ngezulu kodwa ayisikho okungabangela ukuthi lingalimi. Ngalokhu-ke kubalulekile ukuthi lilime izilimo ezincane ezingadingi izulu ezifana lemibhida, amatamatisi, ihanyanisi,” kuchaza uKhomuredi Zhuwao.
Uqhubekele phambili njalo wakhuthaza ontanga ukuba bafuye izilimo ukuze bazithuthukise.
“Kuqakathekile njengabontanga ukuba liqale ukufuya noma nje uqale ngokufuya izifuyo ezincane. Lapha ngichaza ukuthi lezo zifuyo elilazo lingazideleli ziphatheni kuhle ukuze lenelise ukuzithuthukisa okuzindlela zokusekela uhlelo lwe-Zim Asset,” kutsho uZhuwao.
UMqondisi wenhlanganiso yeYoung Africa uNkosikazi Enet Mukurazita usekele lokhu ngokuchaza ukuthi labo njengenhlanganiso bayafundisa ngezokulima.
“Inhlanganiso yeYoung Africa layo iyakhuthaza ukuthi ontanga balime yikho nje ngomnyaka ka2013 yavula isikolo sokufundela ezokulima eDondo eMozambique ngenhloso yokufundisa ontanga ngezokulima,” kutsho uNkszn Mukurazita.
Online Reporter