adminNcekwenhle Ncube
ABANTU abatsha sebexwayiswe ukuthi bengathathi izidakamizwa ngoba zingenye imbangela yokumemetheka kwemikhuhlane ethelelwana emacansini phezu kwalokho itshabalalisa ikusasa labo.
Ekhuluma emncintiswaneni weNational AIDS Council (NAC) obuqhutshwa ngolwesihlanu eBulawayo City Hall uProvincial AIDS Co-coordinator uNkosazana Sinatra Nyathi uxwaye abantu abatsha ukuthi batshiyane lokudakayo ukuze ikusasa labo libe lokukhanya.
UNkosazana Nyathi uchaze ukuthi abatsha sebelomkhuba omubi wokuthatha isiko lamanye amazwe elokusebenzisa izidakamizwa balenze elabo.
“Bantu abatsha tshiyani utshwala, imbanje kanye lakho konke okudakayo. Ziyingozi kakhulu ezimpilwenu kanye lekusasa lenu.
“Abanengi bacina bebamba imikhuhlane eminengi ethelelwana emacansini ikakhulu igcikwane leHIV/AIDS. Lokhu kungenxa yokuthi lisuka liyengwe yimizwa yenu lizithole lisiya emacansini labantu lingazivikelanga.”
Uqhubekele phambili wasola indlela abantu abatsha abaziphatha ngayo uma kusiza kwezothando. Ugcizelele ukuthi kubi ukuthandana labosotshukela ngoba yibo abathwele imikhuhlane.
Ubuye waxwayisa labo abathe babamba umkhuhlane kumbe abazelwe belawo ukuthi bangaziphathi butshapha ngokunatha lokubhema okudakayo ngoba basaselayo impilo lekusasa elihle nanko phela amaphilisi akhona kulezinsuku.
Abatsha baphiwe umlandu wokuziphatha kuhle ngoba beyibo inkokheli zakusasa okumele ziphakamise isizwe zilwe lokungaziphathi kuhle kwabasakhulayo.
Kusenjalo nje kuviki ephelileyo isikhulumi samapholisa akoBulawayo uPrecious Simango uke wakhuluma kabanzi ngabasakhululayo ngendlela abasebenzisa ngayo izidakamizwa.
Uchaze ukuthi amacala amanengi adalwa ngabantu abatsha abangelwa yikuthi bayabe bedakwe zimbanje, utshwala kumbe ezinye izidakamizwa ezicatshangelwa ukuthi zivelela phandle kwelizwe.
Online Reporter