admin
Cornelius Luphahla
Lonyaka abaculi bakoMthwakazi bathembisa uzulu olukhulu nanko phela kukhanya bonke bathi ngo2015 kade bengenzi lutho kodwa lonyaka uzulu uzazibonela ukudla kwamehlo.
Abaculi abaveze lokhu bagoqela uMartin Sibanda, Clement Magwaza, Ndux Junior, Jeys Marabini, Khuxxman labanye.
Inengi labo kukhanya lizakhipha amadlalade amatsha lonyaka noma nje abanye abafana loMagwaza sebephakulele abalandeli babo uluju lwendlebe.
UMthunywa uxhumane lomunye walababaculi uMartin Sibanda wachaza ukuthi lonyaka uza lokukhulu, abantu balungiselele.
“Lonyaka ngikhangelele ukujabulisa uzulu okwedlulisileyo ngoba ngiza lokukhulu. Ngifuna ukuthi nxa ngingenile umphakathi unyakaze ngoba ngizakhipha elinye idlalade elitshisayo. Ngakho lonyaka liphumile ilanga akulalwa, kuzajabulwa kuze kuse,” kutsho uSibanda.
Omunye wabaculi laba uJeys Marabini uveze njalo ukuthi lonyaka ukhangelele ukuvakatshela indawo zonke zakoMthwakazi azijabulise.
“Lonyaka ngumnyaka wenjabulo ngakho thina njengeqembu sikhangelele ukuvakatshela isizwe sonke sakoMthwakazi ukuze abangazake basibone mathupha basibone basazi kuthi lalabo abathakazelela umculo wethu kodwa bewuswela labo bawuthole,” kuchaza uMarabini.
UClement Magwaza omunye wabaculi bakoMthwakazi uchaze ukuthi ukhangelele ukuvakatshela uzulu ukuze azwe idlalade lakhe alikhiphe kunsuku ezisanda kudlula.
“Lonyaka ngikhangelele ukuhambela abantu indawo zonke ngibazwise idlalade engilikhuphileyo elithi, “Isitambo sami.” Lapha ngilethemba lokuthi kuzanyakaza ngitsho lekhehla eselimxhiliba ngoba asebelidlalile idlalade leli bonke bayalithakazelela okumangalisayo,” kuveza uMagwaza.
Umculi odumileyo koBulawayo uKhuxxman ubikele intatheli ukuthi lonyaka ufuna ukwenza ukudla kwamehlo.
“Njengoba nje umphakathi usazi ukuthi ngidume ngokwenza izinto ezimnandi lonyaka khona angikhulumi. Wonke umuntu ngikhangelele ukuthi ajabule okwedlulisileyo akhohlwe ngokumkhathazayo,” kuchaza uKhuxxman.
Ngenxa yamazwi abaculi bakoMthwakazi kusobala ukuthi lonyaka bonke abaculi babophe zaqina njalo balungisele uzulu ezimnandi kuphela.
Online Reporter