Online Reporter
Mthabisi Tshuma
BAZANGCWATSHA ngoMgqibelo abantu abahlanu ababulawa ngemva kokuhlaselwa ngesihluku yindoda okusolelwa ukuthi kayiphilanga engqondweni, esiqintini seMadlambudzi, ePlumtree.
Isihluku lesi senzakale ngeviki edluleyo. Ngokubika kwamapholisa, umetheswacala nguPhamani Sibanda (43) okubikwa ukuthi wavuka umbhejazane wahlasela abantu abayisikhombisa ngogodo lwesihlahla sephane lenye into ecijileyo.
Inkonzo yomngcwabo izaqhutshwa ngoLwesihlanu eMadlambudzi Hall, esigabeni seBulilima, esabelweni seMatabeleland South. UHulumende uzimisele ngokuncedisa kumingcwabo le.
Abedlula emhlabeni nguElliot Khupe (101), Butho Tshuma (97), Constance Sibanda (66), Tiffan Surprise Ndlovu (6) loCatra Matsika (72).
Abanye abantu ababili abahlaselwayo, abaleminyaka engu-90 le-41 yokuzalwa, bahanjiswa esibhedlela.
Lo oleminyaka engu-41 usephumile esibhedlela, oleminyaka engu-90, uGogo Mpopoma Ngwenya, usesimeni esingcono esibhedlela sePlumtree District. Umyeni kaGogo Ngwenya ungomunye wabahlanu ababulawayo.
Ummeli weBulilima ePhalamende uDingumuzi Phuti, ophinda abenguMsekeli kaMphathintambo wogatsha lwe-Information Communication Technology, Postal and Courier Services, uhlangane labakhokheli bomdabu abagoqela induna uMadlambudzi, amapholisa lemuli zabafelwayo, kuqoqwa imingcwabo.
Kusenjalo, ibandla elibusayo iZanu -PF selithumele amazwi enduduzo ezimulini. UMphathintambo weProvincial Affairs and Devolution eMatabeleland South, u-Albert Nguluvhe kukhangelelwe ukuthi akhokhele emngcwabeni.
Ilunga leZanu-PF Politburo uRichard Ndlovu uthe: “Kunzima. Sizibuza imibuzo engelampendulo ngalokhu okwenzakaleyo.”
