Online Reporter
Nkosilathi Sibanda
LOBA ikhisimusi kulilanga elinanzwa ngamabandla ezokholo kakhulu, kwabanengi lilanga lenjabulo.
Phakathi kwalinjabulo, abaculi bandise ukuthi kube lemicimbi ehlanganisa ezomculo, ukudla lokunatha.
Ngalokho, kuba likhefu lapho abaculi abathola ithuba lokuthokozisa uzulu emcimbini le.
Iphephandaba likazulu lixoxisane labanye abaculi bakoBulawayo mayelana ngenhlelo zabo zeKhisimusi.
Inengi lithe liqoqe imcimbi yokubuthanisa abantu endaweni zokukholisa, ikanti abanye bathe bazachitha isikhathi belemuli zabo, nanko kade besebenza umnyaka wonke lo.
UMzoe7, oyintandokazi yomculi phose kulo lonke ilizwe, uthe kasoke aphumule. Uthembise ukuqhubeka ejabulisa abantu.
“Ngithi iKhisimusi enhle kini lonke. Lapho engizabe ngiqhunsa khona, ngithembisa iKhisimusi emnandi. Ngeke ngiliphoxe balandeli bami, kodwa ngithanda ukwethula isibongo esikhulu kubo bonke abalandele umculo wami,” nguMzoe7 lo.
UMzoe7 uqede lumnyaka ebalelwa kubaculi abenze kuhle e-studio ngokupheka ingoma ezihlabusayo, ezenze abantu basukuma ezitulweni bagida emcimbini etshiyeneyo. Uphinde njalo waqinisa inkampani yakhe yempahla zomswenko eye #GagaGugu.
Umculi weJazz, uJeys Marabini uthe uzazama ukuthi aqamule isikhathi sekhefu ngokuthola ithuba lokuba lemuli yakhe kunye lokuqhubeka ecula.
“Kithi abaculi isikhathi sekhefu sinzima. Siyabe sithola umsebenzi wokuqhunsa endaweni ezinengi kodwa mina ngizathi ukuthola isikhatshana lemuli yami, ngithi ukuphumula kancane loba ngizabe ngididizela. Yiyo impilo yakhona. Abantu kabajabule, babonge ukugcinwa nguNkulunkulu lonyaka,” kubika uJeys Marabini.
KuluMpalakazi, abantu basuswa phansi ludumo lwengoma ethi Imali Yes’gweja eyahlatshelwa nguFab G, Umshana kaGogo.
Umculi lo uthole imvuselelo entsha emsebenzini wakhe ngalingoma esiphenduke yaba yingoma yesizwe, kusukela emadolobheni kusiya emaphandleni lakundawo lapho okulezimbamgodi.
Uthe ngesikhathi seKhisimusi kaphumuli.
“Yibunandi ngibulala kuliKhisimusi. Sizakudla imali yesigweja kuze kuse,” nguFab G lo.
Uthe ukhuthaza abantu ukuthi baqaphele ingozi ngalesi isikhathi sekhefu.
“Makube likhefu elihle kithi sonke, siphethe umnyaka siphephile, sikholisa umculo lakho konke esizakwenza.”
USandra Ndebele, okade wavuthisa inkundla kwezomculo uthe abantu kabaqhubeke besekela umsebenzi wakhe njalo bengakhohlwa ukuchitha isikhathi lemuli zabo.
“Enginga kutsho yikuthi kasisekele umculo wethu. Nxa abaculi bengelalo usekelo ngeke baphile. Ikhisimusi kayibe likhefu lapho esizakholisa sisonke kodwa singakhohlwa ukuba lemuli zethu, sijabula.”
Umculi wohlobo lwe Hip-Hop, uNolunju J utshele iphephandaba likazulu ngeSonto ukuthi kasoke ahlale phansi. “Akuhlaleki phansi nxa ungumculi. Isikhathi lesi uzithola umatasa tasa ubizwa kuzo zonke indawo. Njengoba kuyiwo umsebenzi wethu,” kutsho uNoluntu J osanda kuphiwa isicoco seBulawayo Arts Awards.
