Ngiyangizwe amakholwa amanengi nxa befuna ukuzivikela ngokunatha utshwala uzwe bethi lendodana kaNkulunkulu yatshintsha amanzi aba butshwala.
Kumaviki edluleyo kuke kwanxuswa abantu lamabandla abo ngoba kwakuthiwe kuzabuya abaphurofethi abavela emhlubulweni wempumalanga, bagcwala abantu ngathola kuyinyelani, into eyangimangalisayo yikuthi kwathi inkonzo isizaqala ngezwa omunye wabaphurofethi ebiza abanye bakhe ebanyenyezela esithi baqale bayegojela okubutshwadlana obabusele ukwenzela ukuthi bangabi lamahloni nxa sebeme phambi kwabantu.
Abaphurofethi laba babesithi lokhu bakwenzela ukuthi babe lesibindi sokutshela abantu lokhu umoya abatshengisa khona. Ontanga abanengi bamanye amabandla ayenxusiwe kwakuyiso leso bebhoda ngemuva kwezixuku bathi mothu njalo abanye bakhona bephafuza igwayi ufice sekuyibutayitayi.
Lezinsuku inengi labazalwane uzwa bethi okungena emlonyeni akungcolanga okuphumayo yikho okungcolileyo. Eqinisweni utshwala lomuntu okhonzayo yinto ezimbili ezehlukeneyo ngoba isikhathi esinengi ungakhangelisisa izinto ezenziwa ngumuntu esenathile ezinye zakhona zihlasimulisa umzimba. Siyake sizwe nxa umuntu esegwetshwa enkantolo esebovula okwenkomokazi edlelwe inkonyane yingwe esecela uxolo kumantshi esithi wakwenza ngoba edakiwe engasazenzi.
Kambe etempelini likaNkulunkulu nxa kunganuka ugologo kungalunga yini? Phela umuntu onathileyo kuvamile ukuthi aphambane labanye ufice esenza insindabaphenduli. Ngalelolanga kwafika isikhathi sokuthi umuntu lomuntu kazithandazele kumbe uguqile kumbe uhlezi omunye ujaha wahle wathi daca phansi.
Uthe loba evuswa wehluleka khona ukuma ngenyawo.
Amakholwa ayizolo ayengabuthinti utshwala ngoba ekwazi ukuthi kulula ukuthi bukudonsele ekwenzeni izinto ezimbi ezizakuphambula endleleni kaNkulunkulu ucine usuhamba endleleni kaSathane.
Ayixabene.
