Nkosilathi Sibanda
AKUBIZWA ozwayo kulimpelaviki enzikini yeMaphisa, eMatabeleland South lapho okuzaqhutshwa umkhosi weKCD Mohadi Sports and Business Expo.
Umkhosi lo, ohlelwe yi-Zanu PF Matabeleland South Youth League uqala ngoLwesihlanu 13 Lwezi kusiya ngoMgqibelo 14 Lwezi 2026. Uzahlanganisa imidlalo etshiyeneyo, imibukiso yamabhizimusi ngaphansi kwendikimba ethi, “Ukuthuthukisa abasakhulayo abangasebenzisi izidakamizwa ukuze kufezwe uMbono ka-2030”.
Ekhuluma lephephandaba likazulu ngoLwesine, umgcinisihlalo weZanu PF Youth League esabelweni seMatabeleland South uMoses Langa uthe baphakathi kwamalungiselelo okucina njalo bakhangelele ukuba lomkhosi omuhle.
“Imidlalo ezakuba khona igoqela ibhola lenyawo elabesilisa labesifazana, ukuqaga, ezokugijima, iboxing, ukutshova amabhayisikili lomdlalo we-snooker.
“Abathanda ezokugijima bazancintisana kumabanga atshiyeneyo ku-21km, 22km, 10km, 5km le-3km, kuthi imidlalo yokutshova amabhayisikili le-snooker ivulelwe bonke abafisa ukuncintisana kungakhathalekile iminyaka yabo,” kutsho uLanga.
Uthe ngaphandle kwemidlalo, umkhosi lo uzakuba lemikhankaso yokwazisa uzulu ngengozi zokusebenzisa izidakamizwa lotshwala, imibukiso yamabhizimusi asakhulayo lamankampani amancane laphakathi ama-SMEs.
Kuzakuba njalo lomkhankaso wokuthuthukisa amasiko agoqela umculo, imigido lemidlalo yokulingisa.
“Sizimisele ukuqhuba kakuhle ihlandla lesithathu lomkhosi lo ohlose ukukhuthaza abasakhulayo ukuthi baphile impilo bengasebenzisi izidakamizwa. Sibanike amathuba okuthi kubonakale iziphiwo zabo kwezemidlalo, bathuthukise amabhizimusi abo, babe yingxenye yemisebenzi yokuthuthukisa ilizwe.”
