Thupeyo Muleya
IZAKHAMIZI zeBeitbridge East zithithibele ngemva kokuba indoda ethile isolwa ngokuphosela indodakazi yayo eleminyaka engu-16 yokuzalwa emgodini icabanga ukuthi izafela phakathi.
Kodwa, intombazana le isinde ngendlela eyisimanga njalo itholakale iphila ngoMvulo ekuseni ngemva kokuhlala insuku eziyisithupha emgodini lo.
Kubikwa ukuthi umgodi lo utshona okwamamitha angu-12 njalo intombazana le yasinda ngokuthi ingatshoni iye phansi kakhulu ngoba yayibanjwe zimpande lezihlahla ezaphoselwa phakathi ngabantu kudala.
Isiga lesi senzakale eTongwe Village, kuWadi 4, eBeitbridge East, ngaphansi kwendawo kaHeadman Foromela. Izakhamizi zendawo le zilokhe zithithibele ngalokho okwenzakeleyo. Kubikwa ukuthi ichithe insuku eziyisithupha ingelakudla kumbe amanzi emgodini lo.
Okwamanje isesibhedlela seBeitbridge District Hospital.
Umfakazi oqotho uthe amapholisa azama ukuthola abazali bomntwana lo ngemva kokufika emzini wabo athola kungelamuntu.
“Uphenyo luyaqhubeka njalo silandela umkhondo ukuze sithole ukuthi kwenzakaleni mayelana lesiga lesi,” kutsho umfakazi lo.
UDokotela Lenos Samhere, onguDistrict Medical Officer eBeitbridge, ubengatholakali ukuthi aphawule ngesimo sempilakahle yomntwana lo. Isizatho sokuthi uyise womntwana wamphoselelani emgodini asaziwa.
Induna uTshitaudze yeBeitbridge iqinisekise isiga lesi ngoLwesibili yabuye yacela izimuli ukuthi nxa zilohlupho zisebenzise izinduna labanye abakhokheli bomdabu ukuxazulula izinkinga. Lokhu kuyethusa njalo sicela bonke abantu emphakathini ukuthi banakekelane. Okwenzakale emntwaneni lo kuyakhathaza njalo sithemba ukuthi udaba lolu luzalungiswa masinyane,” kutsho induna.
“Sisalindele ukuthi amapholisa aqhubeke ngophenyo lwawo. Asikufuni ukuziphatha okunje kwabazali. Okwamanje umntwana lo uhlukumezekile njalo usesimeni esibuthakathaka. Eqinisweni, umphakathi wonke ulokhu uthithibele ngesiga lesi.”
Izakhamizi ezikhulume lentatheli kodwa ezingathandanga ukuqanjwa ngamabizo zisole indlela umntwana lo ayephathwa ngayo emzini ngakibo. Zithi wayephathwa ngendlela engafanani leyabanye abantwana njalo wayelaliswa yedwa esakhiweni esibi esakhiwe ngamapulastiki lezinye impahla.
Ziphinde zathi umntwana lo wayengatholi uthando lokunakekelwa okufanana lokwakutholwa ngabanye abantwana bakwabo abathathu.
UNkosikazi Babongile Gora osebenza ukugcina abantwana, uthe okwamanje okuqakathekileyo yikumsiza ukuthi asile ekuhlukumezekeni adlule phakathi kwakho.
“Umntwana lo udlule phakathi kobunzima obukhulu. Ngaphandle kokusinda kwakhe emzimbeni, kumele sigxile ekumsizeni ukuthi asile ngokwengqondo,” kutsho uNkkz Gora.
“Abantwana abasesimeni esinje badinga ukunakekelwa, ukuncediswa ngendlela efaneleyo lokuvikelwa ekukhulunyelweni kubi kumbe ekuphindeni bahlukumezeke.
“Ukusila kwakhe kuzathatha isikhathi. Sicela uzulu amsekele hatshi ukumbandlulula. Asimnikeni isikhathi.”
