Langalakhe Mabhena
UMDLALI wezobuciko bokulingisa owayelilunga leqembu leMkhathi Theatre Works, uHebson Chigodora “Chigiza” Ncube, usedlule emhlabeni.
UChigiza ubhubhe ngoLwesithathu, mhlaka 11 Lwezi 2026.
Imbangela yokufa kwakhe kayikabikwa.
Abangane lezihlobo babuthene ku-30186/8 eNtumbane koBulawayo, eduzane leNtumbane Hall.
Iqembu leMkhathi Theatre Works liqinisekise ngokufa kwakhe, lichaza uChigiza njengomuntu owayezinikele kwezobuciko, njalo ethanda ukuncedisa ekukhuliseni iqembu.
Kumbiko walo, leliqembu lithe uChigiza waba lilunga lalo elincane elalibizwa ngokuthi yi-Cloud ‘00 ekuqaleni kweminyaka yabo-2000, ngaphambi kokuba angene kuqembu labakhulu.
Iqembu leli lithe uChigiza waqhubeka elilunga lalo kwaze kwaba ngo-2023, kodwa ukutshiya kwakhe akuzange kususe indawo yakhe kumbali yalo.
“Lamuhla asikhumbuli kuphela umdlali wezobuciko, kodwa sikhumbula lezikhathi esaba lazo kumsebenzi wolwazi. Lanxa uhambo lwakhe kuMkhathi lwaphela ngo-2023, uzahlala eyingxenye yembali yemuli yethu. Sithi phumula ngokuthula, Chigiza. Sizahlala sikukhumbula,” kutsho lumbiko.
Iqembu le-IYASA lithe uChigiza wayengumuntu othanda ukwabela abanye ulwazi, njalo wayezinika isikhathi sokuncedisa abanye abadlali abatsha.
“Ngemva kokutshiya kwakhe iMkhathi ngo-2023, uChigiza waqhubeka esabelana lathi ithalenta lakhe ku-IYASA. Wayejwayele ukusivakatshela ukuze asincedise ngokuhlela imigido, ulwazi lemibono yakhe yokusungula izinto ezintsha,” kutsho i-IYASA.
Inhlanganiso le ithe izamkhumbula ngomsebenzi wakhe kwezobuciko, ukupha kwakhe, isikhathi ayesinika abasakhulayo ukuze bathuthuke kwezokulingisa.
“Phumula ngokuthula, Malume wama2K.”
Umbiko ogcweleyo mayelana lamalungiselelo omngcwabo azakwaziswa ngokuhamba kwesikhathi.
