Online Reporter
Lovemore Dube
ISIKOLO seSobukhazi High sesithole ukunconywa okuphezulu ngokuqhubeka kwaso silolonga abantwana abalethalenta elimangalisayo kwezemidlalo.
Lokhu kulandela ukwenza kuhle kwabagijimela iZimbabwe uThandazani Ndlovu loMethembe Tshuma, asebekhethwe ukuthi bayencintisa kuma-African Senior Championships, edolobheni le-Accra eGhana.
Abafana laba babefunda esikolo seSobukhazi High kuminyaka emibili edluleyo njalo bakhulisa ithalenta labo besenkundleni zalesi isikolo.
Bakhethwe ngoLwesibili ukuthi babengamalunga eqembu lelizwe elizagijima eGhana ngeviki elizayo.
Umphathisikolo weSobukhazi High uCain Ncube uthe bazizwa bephakanyiswe ngabafundi babo.
“Silokujabula kakhulu ngesenzo sabafana laba. Bafunde kulesi isikolo. Abakwenzileyo enkundleni yokugijima kuphakamise ibizo lethu,” kutsho uNcube.
“Basifake phezulu. Kuyasijabulisa ukuthi benelise ukuthi bakhethwe ukuyancintisela ilizwe njalo. Loba sebaqeda ukufunda kithi, siyabavumela ukuthi balolonge enkundleni yethu. Sithi amhlophe athe nke ngalokhu abakwenzileyo, sibafisela ukuthi baphumelele besiya phambili. Lokhu kwenza abanye abafundi babelethemba empilweni.”
Uthe ukugijima kwalaba bobabili sekubafaka kubanga lokuthi inkundla yesikolo ikhangelelwe ukulungiswa kakuhle.
“Sicela abangaphathisa babuye phambili sisizane sendlalele abantwana ikusasa ngenkundla yokugijima efaneleyo,” nguNcube lo.
UNdlovu umangaze iZimbabwe lesigaba sonke ngemva kokugijima i400m ngemizuzwana eyi-44.71, okuyisikhathi esihle kakhulu esisondela ku-national record yemizuzwana eyi-44.58, eyahlelwa nguLewis Banda ngo2004.
Ngempelaviki edluleyo kumaWorld Relays, wavuka idimoni ku4x400m lapho aphiwa khona isigodo sokuthi aqedise umango, wagijima imizuzwana eyi-43.92 okwamenza waba ngowokuqala ngqwa wakuleli ukugijima ngaphansi kwemizuzwana eyi-44.
UTshuma laye wenze kuhle ngemizuzwana ye-20.26, kukanti ku100m uqede ngemizuzwana eyi-10.22.
UNdlovu uzagijima i400m le 4x400m. UTshuma uzancintisa ku200m le4x100m. USamukeliso Ndebele laye ukuqembu leZimbabwe eliya eGhana.
Umqeqetshi weqembu leli uLisimati uthe ulokuthokoza kakhulu ukuthi abasekhaya sebenelisa ukwenza izimanga njalo lentsha iyahluma, igijime izikhathi ezingcono kuleza labo abakade bekhona.
Iqembu eliya eGhana lisuka ngoMgqibelo ekuseni njalo likhangelelwe ukuthi lizafika emini e-Accra, lijwayele umkhathi wendawo, kungakaqalwa ukugijima ngoLwesibili.
