Nkosilathi Sibanda
UCLEMENT Magwaza usetshengise abantu ukuthi “kapheli moya” njalo usasekhona kwezomculo.
Lokhu kubonakele ngesikhathi esethula idlalade elitsha ukuthi umculi lo uzimisele emsebenzini wakhe. NgoMgqibelo odluleyo abalandeli bakhe, labanye abathanda umculo kaMgwaza lomdumo weRhumba bagcwalise phamu inkundla yePalace Hotel koBulawayo, belande ukuzwa ingoma ezikudlalade elitsha.
UMagwaza, lequla lakhe leMacrey Super Sounds, batshiye abantu besuthi ngomculo.
Umculi lo wethule idlalade elitsha, Nhliziyo Mhlophe elilengoma eziyisikhombisa, kulandela ukwethula elinye idlalade ngo2025, enkundleni efanayo. Kumcimbi wangoMgqibelo, iqembu likaMagwaza lincediswe esitikini ngabanye abaculi abagoqela iMlambos Band, Prosper Bafana, Bhora Bhora, Dziba leMvula loFortue Dawu.
Iphephandaba likazulu likhulume loMagwaza obike ukuba ukwethulwa kwengoma ezintsha kuvele kusicelo sabalandeli bakhe.
“Sethule ingoma ezizathandwa ngabantu abanengi. Loba umthanda kumbe umzonda uMagwaza, idlalade elitsha lizakujabulisa kuphela,” kutsho uMagwaza.
Umcimbi lo ubuqhutshwe ngaphansi kwendikimba ethi “Ingoma ezintsha, udaba olutsha.”
UMagwaza uqhubeke wathi: “Idlalade lethu lilengoma eziyisikhombisa ezikhuluma ngezimo ezitshiyeneyo ezenzakala empilweni. Abalandeli bethu ngithemba bazamukela idlalade leli ngenjabulo.
Ngendlela engibone abantu bejabula ePalace, kutsho ukuba laphandle ingoma zethu zizaletha injabulo kwabanengi.” UMagwaza uthole usekelo olukhulu kwabanye abaculi labandeli abamnike imali lezinye izipho ngesikhathi esethula idlalade.
Kusenjalo, usomabhizimusi wakoBulawayo, oqhuba inhlelo zokuzithokozisa ePalace Hotel, uTapiwa Gandiwa uthe uzaqhubeka esekela abaculi bakuleli, ikakhulu labo abakumhlubulo ongezansi yelizwe.
“Kuhle okwenziwa nguMagwaza. Ngaphandle kokuphakamisa umculo wakhe, uphakamisa abantu lamabhizimusi asebenzisa umculo wakhe.
“Thina njengamabhizimusi, lama-promoter ezomculo, sizahlala sibasekela. Sinxusa bonke abaculi ukuthi baze endaweni yethu, bethule umculo wabo. Kumele babekwazi ukuthi sikhona njalo sizaba sekela,” kutsho uGandiwa.
