adminYiNtatheli kaMthunywa
INHLANGANISO yeWidows Empowerment Trust iphakathi kokuqhuba uhlelo lokufundisa abafelwakazi bemhlubulweni weMatabeleland ngamalungelo abo lendlela zokuzithuthikisa ukwenzela ukuthi bengabulawa yindlala.
Kubikwa esikhathini esinegi abafelokazi bavame ukuzikhangelela phansi okucina kubangela ukuthi bengaphatheki emsebenzini wokuthuthukisa izigaba zabo.
Omunye umfelwakazi okhulume loMthunywa obengene emhlanganweni oqhutshelwe eSontala, eKezi uNkosazana Sthatshisiwe Ncube uthe ezinye izakhamizi azibaphathi njengabantu ngoba bengelamadoda.
“Ukubangumfelwakazi kufana lokuba yisigcabha sokwesulela inyawo ngoba konke okonakalayo ezigabeni kwesulelwa kithi. Ngenyanga bekulomgido esigabeni sethu kwathiwa abafelokazi bayelungisa indawo yakhona kodwa kasizange siphiwe lutho.
“Yonke into ephambanisekayo lapha esigabeni umfelwakazi nguye owokuqala ukucatshangelwa.
Kungatshontshwa emizini abantwabethu yibo abacatshangelwayo,” kutsho uNkszn Ncube.
Omunye njalo umfelokazi uNkosazana Lucia Moyo ovelela eNtepe, eGwanda uthe olunye uhlupho abakhangelane lalo njengabafelwakazi ngolokuphathwa njengabantu abangelamsebenzi, abathatha amadoda abanikazi njalo abangabathakathi ababulala amadoda abo.
“Amanye amanina awafuni lakusibona asicabangela ukuthi singawathathela amadoda abo njalo awafuni kudlelana lathi. Ungathi ungumfelokazi ubonakale uhamba lamanina alamadoda uyahlekwa uze uhawule kuthiwa uzisikelela ehwahweni labantu abalamadoda wena ungelayo,”kutsho uNkszn Moyo.
Isikhulumi senhlanganiso le uNkosikazi Mildred Mudzengi uthe baphakathi kokuqhuba uhlelo lolu ukwenzela ukuba abafelwakazi bazizwe bengabantu phakathi kwabanye abantu.
“Abafelwakazi bavame ukuhlangana lenhlupho ezithile ekuphileni kwabo ngakho Sizama ukubanikeza ithemba lokuthi ukufelwa akusikho kuphela kwempilo. Okunye esibafundise khona yikuthi kumele bazenzele imisebenzi yezandla ukuze bathole imali.
“Okwenza bakhangelelwe phansi yikuthi abalamali ngakho bengalandela lokhu esibafundise khona bazaphila ngcono ezigabeni zabo,” kuphetha uNkkz Mudzengi.
Online Reporter