adminFairness Moyana
KULOMPHUROFETHI weJambezi otshiye abantu bengelamathe ngemva kokuthi ulaywe ‘ngumoya ongcwele’ ukuthi agezise umntanomnewabo oleminyaka engu-18 andubana amdlwengule.
Kubikwa nyakenye ngenyanga kaNcwabakazi umsolwa, ongumphorofethi njalo okhokhela ibandla esigabeni se-BH 3 eJambezi wahlangana lomntakamnewabo evela komakhelwane ukuyacela inhlanyelo yomumbu. Wathi kuye kukhona afuna ukumtshela khona engakambizeli lapho ahlala khona.
Kuzwakale ukuthi ngalelolanga emini umsolwa waya ngakibo kamamangala lapho afika wabika ukuthi uboniswe ukuthi kuzenzakala into embi kuye. Ngakho-ke wamupha imithandazo, wayamukela.
Wamupha amanzi athi angcwele wathi ayehlamba ngawo eguswini njalo engathalazi emuva ngethuba ehlamba. Kubikwa wavuma wasehamba-ke ukuyageza eguswini, wathi esekhiphile izigqoko waqaleka ebona uyisemncane emva kwakhe.
Engakatsho lutho umphorofethi wathi kuye ‘umoya ongcwele’ usumlaye njalo ukuthi amgezise ukuze umoya omhleziyo uphume. Esadidekile njalo esesabela impilo yakhe, wavuma kodwa waqala ukusola ngesikhathi uyisemncane esendlala ilembu phansi andubana amlaye ukuthi alale kilo.
Inkundla izwe ukuthi umsolwa waphinda wagcizelela ukuthi nxa engasakwenzanga lokhu lowomoya uzambulala.
Kubikwa uTshuma wathatha ilembu lakhe wamvala amehlo engakamdlwenguli.
Umtshutshisi kulelicala ubikele inkundla ukuthi umsolwa eqeda kumhlukuluza wamtshela ukuthi umnyama lowo usuphumile.
Ithumba leli kubikwa libhoboke ngenyanga kaZibandlela lapho ijaha likamsolwa elala khona umthwalo lisithi usulesikhathi eside okuyikho okwenza umamangala wabikela udadewabo andubana bayebikela amapholisa.
Umsolwa ebuzwa ngecala leli uthe kazange adlwengule umamangala kodwa bavumelana njengoba babethandana.
UMantshi uMark Dzira uthe embuza ukuthi kungani wathi athathe amanzi ayehlamba eguswini, ngakho wamphendula wathi kwakuyindlela yokuvala abazali bakhe ukuthi bengaboni.
Kusenjalo kube nzima ukuthi inkundla isole umsolwa ngecala lokudlwengula ngoba umamangala waphuza ukubikela amapholisa ngokuhlukuluzwa kwakhe.
Umtshutshisi kulelicala bekunguTawanda Sigauke.
Online Reporter