Online Reporter
Sikhumbuzo Moyo
ABAFUNDI abangu-40 000 bayekele isikolo zamabanga aphansi laphezulu nyakenye, njalo kubikwa ukuswela imali, ukwenda amasinyane, ukukhulelwa kanye lokusebenza kwabantwana yikho okuyimbangela enkulu yalokhu.
Ngokwembiko ye-2025 Primary and Secondary Education Statistics Report, eyaziwa njalo ngokuthi yi-Education Management Information System (Emis) Report, eqoqwe lugatsha lwePrimary and Secondary Education, kulabafundi abazinkulungwane ezilitshumi lantathu lamatshumi amathathu lambili (13 032) abayekele izikolo zamabanga aphansi kanye labayinkulungwane ezingamatshumi amabili lasithupha, amakhulu ayisikhombisa lane (26 704) abayekele izikolo zamabanga aphezulu kukonke kulabafundi abangu-4 671 149.
“Kukonke kulabafundi abangu-13 032 abayekele izikolo zamabanga aphansi, kulabafana abangu-7 242 kanye lamantombazana angu-5 790 ababalwa ngo-2025. Imbangela enkulu yokuyekela isikolo yikuswela imali, okuthinte abafundi abangu-5 548, okuthinte amantombazana kakhulu kulabafana.
Isizatho sesibili esivame kakhulu yikubaleka esikolo, okubangele ukuthi abafundi abangu-4 866 bayekele izikolo njalo abafana yibo ababaleka kakhulu kulamantombazana,” kutsho umbiko lo.
Umbiko lo uveze ukuthi ezinye izizatho ezenza abantwana bayekele izikolo zamabanga aphansi zigoqela imitshado (abafana labamantombazana abayi-116) lokukhulelwa (abafundi abangu-102), njalo abafundi abangu-138 abalezidingo eziqakathekileyo labo bayekele izikolo, njalo inani labafana lamantombazana liyafana.
“Isizatho sesibili esivame kakhulu yikubaleka isikolo, okubangele ukuthi abafundi abangu-6 961bayekele izikolo (26,07percent), njalo lokhu kuvame kakhulu ebafaneni (36,16 percent) kulamankazana(18,75 percent). Ukwenda masinyane yikho okubangele ukuthi abafundi abangu-3 917 bayekele isikolo njalo ukukhulelwa kubangele ukuthi abangu2 433 150 bayekele izikolo,” kutsho umbiko.
