Online Reporter
Lovemore Kadzura
MURUME wekwaMambo Zimunya ari kurwira hupenyu hwake muchipatara cheVictoria Chitepo Provincial Hospital, kwaMutare mushure mekubaiwa nebanga pahuro nemumwe murume uyo ainge asina kufara nechikonzero chekuti akaramba kumutengera doro.
Mapurisa akasunga Norest Mbiza (33) wemubhuku rekwaMbiza nemhosva yekuyedza kuuraya Linton Dindingwe (28) uyo aipomera zvekare mhosva yekudanana nehanzvadzi yake.
Mutauriri wemapurisa kudunhu reManicaland, Assistant Inspector Wiseman Chinyoka, vanoti Dindingwe ari muchipatara umo ari kurapwa.
“Nyaya iyi yakaitika nomusi wa26 Chikunguru 2025, munguva dzemanheru uye mupari wemhosva iyi anonzi ainwa doro paMadanga Shops, kuMbiza Village, kwaMambo Zimunya.
“Mbiza akaenda kuna Dindingwe achida kuti amutengere doro. Aitaura zvakare kuti Dindingwe ari kudanana nehanzvadzi yake.
“Dindingwe airatidza kuti akanga asina mari uye mhinduro iyi haina kutambirwa zvakanaka naMbiza achibva avhomora banga risingazivikanwe mhando yaro ndokubaya mumhan’ari kamwe chete pahuro nechepazasi penzeve yekuruboshwe.
“Dindingwe akachekwa pahuro ndokumhanyiswa kuMunyarari Clinic uko akazodarikidzwa kuVictoria Chitepo Provincial Hospital kunorapwa,” vanodaro Asst Insp Chinyoka.
Vanoti chimiro cheutano hwake chiri pari nani uye nyakupomerwa mhosva akasungwa zvisinei nekuti banga iro anonzi akashandisa harina kuwanikwa.
“Tinokurudzira veruzhinji kuti vasaite mhirizhonga senzira yekuedza kugadzirisa nyaya uye kusawirirana kunofanirwa kugadziriswa murunyararo. Vanhu vanenge vaine kusawirirana vanofanira kutsvaga rubatsiro kune vamwe kuti vayananiswe,” vanodaro.
