Online Reporter
Nkosilathi Sibanda
NGESIKHATHI kusalindwe ukuvulwa kwencwadi ezaveza ukuthi ngubani odlale ukwedlula abanye kuCastle Lager Premiership, abalandeli bomdlalo sebephiwe ithuba lokuthi bavotele owabo umdlali.
Isicoco lesi sibizwa ngokuthi yiPeople’s Choice Award. Abalandeli bavotela umdlali abambone etshengisele ukuzimisela, ithalenta lokuba jabulisa enkundleni. Leli lithuba lokuthi abalandeli labo baphose umbono wabo, babe yingxenye yomdlalo.
Uhlelo lokuvota luvulwe ngeviki edluleyo njalo luvalwa lamuhla, ngoLwesihlanu. Ibizo lomdlali othole amavoti amanengi lizakwethulwa kumcimbi wamaSoccee Stars eHarare.
Njengenjwayelo minyaka yonke, abalandeli bamaqembu akuPSL bazaqina ngokukhetha abadlali bamaqembu abawasekelayo.
Abalandeli ababili beqembu leHighlanders abakhulume leZimpapers Sports Hub bathe owabo umdlali ngu-Andrew Mbeba.
UThabiso Gundu Dube uthe: “Mina ngihamba loMbeba. Akula omunye.”
UPatrick Sibanda ubike ukuba uvotele umdlali ofanayo.
UMbeba ngomunye wabadlali abakuqula lengcitshi ezingene kukhalenda yeCastle Lager Premiership. Abanye abadlali nguEmmanuel Jalai (Dynamos), Tymon Machope (Scottland), Abubakar Moffat (MWOS), Kevin Moyo (Scottland), Washington Navaya (TelOne), Jarrison Selemani (FC Platinum), William Thole (Simba Bhora), Isheanesu Mauchi (Simba Bhora), Billy Veremu (MWOS) loEmmanuel Ziocha (Simba Bhora).
Phakathi kwabo, kuzavela Soccer Star of the Year. Ezinye izicoco ngezeGolden Boot ezaphiwa uWashington Navaya oweTelone ohlohle amabhola angu-17. Kuzanikezwa lesicoco sikanoziniti, umqeqetshi kunye lonompembe.
Intshantshu zalonyaka iScottland, izathwala inkezo mhla welanga lomcimbi.
