Online Reporter
Nkosilathi Sibanda
UHULUMENDE useqinise umkhankaso wokukhuthaza abalimi elizweni lonke ukuthi baphangise ukuhlanyela ingqoloyi yesikhathi sobusika ngaphambi komhlaka 31 Nkwenkwezi
Inkuthazo le ibaluleke kakhulu ngenxa yokuthi kulokwesabela ukuthi ukuphuza ukuhlanyela kungaphazamisa isivuno lokuvikeleka kokudla elizweni.
Lokhu kuza ngesikhathi ilizwe liqhubeka ngokukhuthaza abalimi ukuthi bakhuthalele ukukhuphula isivuno sengqoloyi.
UNobhala jikele kugatsha lwezokulima kuHulumende uDokotela Obert Jiri, uthe loba sekulomsebenzi omkhulu osuwenziwe ngabanye abalimi, kukhona abalokhe besasalele emuva ngenxa yokuthi insimu ezazilinywe ngesikhathi sezulu azikawomi ngenxa yomqando okhona.
UDkt Jiri uthe ukuhlanyela ngemva kwesikhathi esibekiweyo kungabangela ukwehla kwesivuno ngoba izilimo zingakhula zibhekane lomkhuhlane omubi ngesikhathi sokuvuthwa kwazo.
“Abalimi bakhuthazwa ukuthi baphangise ukuvuna, ukulungisa amasimu lokuhlanyela ukuze ingqoloyi ihlanyelwe ngesikhathi esifaneleyo ngaphambi kwamhlaka 31 Nkwenkwezi,” kutsho uDkt Jiri.
Uthe ukuhlanyela ngesikhathi kuqakathekile kakhulu ngoba kuyanceda ukuthi ingqoloyi ikhule kuhle njalo ibe lesivuno esiphezulu esinganceda ilizwe ekutholeni ukudla okweneleyo.
Eminyakeni edluleyo iZimbabwe ibe ngelinye lamazwe e-Africa aphumelele kakhulu ekulimeni ingqoloyi, ngemva kokuthi uHulumende eqinise usekelo kubalimi ngokubanika inhlanyelo, umvundiso, ukulungiswa kwemigelo yokuthelezela lokwengeza imitshina yokulima.
Ingcwethi kwezokulima zithi ukuhlanyela ngesikhathi esifaneleyo kwenza ingqoloyi ikhule ngaphansi komkhathi omuhle.
Kodwa, ukubambezeleka kungabangela ukuthi izilimo zihlaselwe yikutshisa ngesikhathi sokuvuthwa, okungayehlisa isivuno.
Kwezinye izabelo ezilima kakhulu ingqoloyi ezifana leMashonaland West, Midlands leMashonaland Central, abalimi sebeqalile ukuhlanyela besebenzisa ukuthelezela njalo uHulumende ulethemba lokuthi ilizwe lizafinyelela inani elifunekayo ukuze abantu basuthe.
