Online Reporter
Sikhumbuzo Moyo
ABALIMI abancane abedlula ikhulu lamatshumi amathathu (130) endaweni yeKwite East, kuWadi 1, eMangwe, eMatabeleland South, bakhala ezimathonsi kulandela ukulahlekelwa yizilimo endaweni engaba yi-200 hectares ngenxa yezulu elikhulu eline ngempelaviki.
Izulu elikhulu leli litshabalalise izilimo ezehlukeneyo ebezilinyiwe, okuzakwenza kube lokusilela kokudla kule indawo.
UDistrict Development Co-ordinator weMangwe uNkosazana Matilda Mlotshwa uqinisekisile ngomonakalo lo, wathi abalimi balahlekelwe kakhulu ngamabele.
“Amabele yiwo otshabalale kakhulu kulezinye izilimo, njalo indawo le izakuba lenkinga yokusilela kokudla ngenxa yalokhu okwenzakeleyo. Abalimi abangu-135 yibo abalahlekelweyo,” kutsho uNkszn Mlotshwa.
Uqhubekele phambili wathi amahekitha amabele angu-75 atshabalele, kwathi angu-50 omumbu, langu-35 enyawuthi, angu-12 endumba, angu-8 amazambane, amabili lengxenye e-butternut, le-1,5 yamajodo le-1,2 yamakhabe.
Kwesinye isehlakalo esihambelana lalesi, omunye umlimi wakuWadi 4, uMnumzana Arthur Ncube, ulahlekelwe zinkomo ezimbili kanye lomuzi wakhe ngemva kokutshaywa yinkosazana.
“UMnu Ncube usele engaselamuzi kulandela ukona kwenkosazana, ngalesosizatho udinga ukuncediswa masinyane ukuze akhe umuzi,” kutsho uNkszn Mlotshwa.
Iziphathamandla zisahlaziya isimo ukwenzela ukubona ukuthi uncedo oludingakalayo lungakanani njengoba imuli ezithintekayo zibhekane lenhlekelele ebangelwe lizulu.
