admin
YiNtatheli kaMthunywa
ABALIMI kanye labanye abaphatheka ekuthengisweni kwesilimo segwayi kulesi isigaba esiqalise mhlaka 7 Mabasa 2021 sebengconywe ngabeTobacco industry and Marketing Board (TIMB) ngokulandela imithetho yokuvimba ukumemetheka kwegcikwane le-coronavirus.
Isikhulu esiphezulu seTIMB uDokotela Andrew Matibiri uthe isigaba lesi siqale kuhle kakhulu njalo uthe ulethemba lokuba kuzaqhubeka kunjalo.
Unanzelele ukuthi ukuthobela kwabalimi imithetho yeCovid-19 akumelanga kube luhlupho kulabo abathintekayo njengoba kungokwesibili ukuthi igwayi lithengiswe ngaphansi kwemithetho eqinileyo yeCovid-19 ngemva kwesigaba esedluleyo.
UMphathintambo obona ngezoMhlabathi, Ezokulima, Ezezinhlanzi, Amanzi kuhle lokuhlaliswa kutsha emaphandleni uDokotela Anxious Masuka uvule okusemthethweni ukuqala kwesigaba sokuthengiswa kwegwayi mhlaka 7 Mabasa, njalo imkambo yama-contract floors yona yavulwa ngosuku olulandelayo.
Kunkulumo yakhe uDkt Masuka uvumile ukuthi abalimi bathwele nzima ngenxa yegcikwane leli, phakathi kwezinye inhlupho ababhekane lazo, ikakhulu ngenxa yemithetho yokuhamba ekhona esiphambanise ukusebenza kwabo kusukela ngomnyaka ophelileyo.
Kusenjalo, uphinde wananzelela ukuthi ukuvulwa kwesigaba sokuthengisa salonyaka kuhambe kuhle lanxa kusenzakala ngesikhathi kulobhubhane lweCovid-19 njenganyakenye wengeza ngokuthi ilizwe likhangelele ukuthi isivuno sibe sikhulu lonyaka ngoba izulu libe linengi.
UDkt Masuka ubonge uHulumende ngokuthi uhlangothi lwezokulima luyingxenye yemisebenzi ebalulekileyo, okwabangela ukuthi izisebenzi zohlangothi lolu zibe yingxenye yezisebenzi ezihamba phambili okumele ziqakathekiswe ekuhlatshweni amajekiseni okuvikela umkhuhlane lo. Emhlabeni wonke jikelele sekulabantu abangu-120 miliyoni asebebulewe ngumkhuhlane lo.
Online Reporter