admin
Leonard Ncube
KULENDODA edume ngokugqekeza ezindlini zabantu eSizinda duze leVictoria Falls okubikwa iphose yadubuka isisu sesigcwele umoya ngemva kokutshontshela omunye usomabhizimusi osuke wampompela umoya esiswini.
UOscar Mushongahande oleminyaka engu-21 okade ehlala emzini kaMnumzana Josphat Banda eSizinda ngaphansi kwenduna uMvuthu, useze esaziwa emthethwandaba lasejele ngoba esebotshwe kanengi njalo uphume ngoZibandlela lonyaka kwelinye icala lokutshontsha.
UOscar ugwetshelwe ukuhlala entolongweni okwenyanga eziyisitshiyagalombili kuviki ephelileyo ngemva kokutshontsha iUS$270 emzini kaMnumzana Samson Ndlovu (44) ohlala eSizinda lapho alesitolo khona.
UMthunywa uthole udletshana lokuthi uOscar ngemva kokugqekeza endlini kaMnu Ndlovu wadliwa ngumswenya kanti akabuzanga elangeni wabuya wazibika yedwa ephethe yonke imali ayeyitshontshile isisu sesikhukhumele.
Kubikwa uMnu Ndlovu wadinga inyanga eyamcebisa ukuthi apompe ivili lebhayisikili okwabangela ukuthi nxa ivili likhukhumala lesisu sikaOscar sizabe sikhukhumala.
UMnu Ndlovu ukulandule lokhu.
“Akusanzakalanga khonokho. Okwenzakalayo yikuthi ngesikhathi ngithola ukuthi ekhaya kutshontshiwe ngahle ngasola yena lumfana ngoba vele eluhlupho njalo ubekhona esigabeni ngaleso sikhathi. Ubesanda kuvela ejele njalo kukanengi etshontsha kwezinye indawo.
“Ngithe ngimlanda ngimbuza walandula ngahle ngathi kuye sengisiya pompa ivili yena wahle wethuka. Yikho ukuyiveza kwakhe imali. Akusilo qiniso ukuthi ngenza njalo ngoba bengingeke ngiye emapholiseni nxa kunjalo,” kulandisa uMnu Ndlovu.
Online Reporter