admin
KUHLE ukukhula emdenini usazi ukuthi uhlala labantu abakuthandayo njalo abazakusekela kuyo yonke into oyenzayo empilweni. Umntwana nxa ekhula, ukhula esazi lokhu njalo kuletha injabulo ukwazi ukuthi uyingxenye yexuku labantu elibizwa ngokuthi ngumdeni.
Kulezinsuku impilo isithe yaguquka ngendlela emangalisayo. Abantu abaselakho ukwezwana lokhuya okwakukhona kudala. Sekusiba lezitha phakathi kwezimuli. Abantu abasafiselani okuhle ezimulini njalo akuseyinto ethokozisayo ukubona umfowenu ephumelela empilweni ngoba umuntu uyabe ecabanga ukuthi ubumpofu bakhe sebuyakhanya emphakathini.
Kubuhlungu konke lokhu. Angithi abantu bosendo lunye kumele kube ngabantu banye okutsho ukuthi ukuphumelela kwesihlobo sakho yikuphumelela kwakho. Inzondano le isiletha udlakela emzini etshiyeneyo lokhu kufakazwa zindaba zokubulalana lokulimazana ezimulini esizibala emaphephandabeni mihla lemihla. Sekusenzakala yonke inyakanyaka ezimulini ngenxa yokungahloniphani lokuswelakala kothando.
Kuyadanisa ukuthi abantu esibathembileyo sithi ngabakithi yibo abantu asebesizwisa ubuhlungu besidlwengula, besigwaza, besihlukuluza lakho konke ongakucabanga.
Umuntu okuthiwa ngubaba usengothatha ingane yakhe ayenze umfazi. Akasakwazi ukuphatha umama kuhle endlini umtshaya mihla lemihla. Kwezinye izimuli uthola umuntu kuthiwa usengene entolongweni ngoba ubulele umfowabo. Iphephandaba likazulu belimumethe indaba ebuhlungu ngeviki ephelileyo. Lindaba ibingeyelinye ixhegu elileminyaka engu-75 elicuye umkalo andubana liyozibophela.
Lokhu kuhlasimulisa umzimba, kusukumise inwele kuphinde kusitshiye silemibuzo eminengi emakhanda.
Owakuqala ngowokuthi kambe undoda lo othethe umphefumulo womkakhe phambi komntwanabo ubengenwe yini?
Kuyini okumenze wangazisoli ngitsho ngesenzo sakhe, wakhohlwa ukuthi ulimaza umama womntanakhe?
Kambe yini engabe ingene ekhanda lomuntu aze aphakamise isandla acuye umuntu ake wamtshela ukuthi uyamthanda bazakufa balahlane.
Uyabe uzonde okunganani ukungabangela ukuthi wenze ihlazo elingaka.
Angithi amapholisa ahlala ekhuluma ngendaba zokuthi kumqoka ukuthi ababili bangazithola bephakathi kokungezwani baphange badinge usizo emuntwini ongabacebisa ngokungenziwa ukuze kwephulwe ulaka olungabangela udlakela. Kuyinto embi kakhulu ukubeka unina wezingane zakho isandla.
Kuyesabeka ukuzwa ngokuthi umuntu usebulele omunye wakhe. Okumele sikwenze yikufunda ukuzibamba lokungaqakathekisi imizwa yenzondo.
Akuqakathekanga ukuzonda kwakho kungakho-ke akumelanga ukwekelele ngoba kungabangela ukuthi ucine usuthethe umphefumulo womuntu omthandayo.
Online Reporter