admin
Buhlebenkosi Gaule
OMUNYE umlimi ozimele yedwa ohlala esigabeni seNkankezi eFilabusi usekhuthaze abalimi kuleli endaweni ezitshiyeneyo ukuba bagebhe imithombo ngoba amanzi ehlupha ngalesisikhathi.
UMnumzana Henry Msipa ohlala kuVillage 16 eNkankezi uthe ukugebha imithombo kungasiza abalimi ukuthi balime izilimo ezivandeni.
“Ngenxa yokuthi izulu kalini kuhle endaweni ezinengi kuqakathekile ukuthi abalimi bagebhe imithombo.
“Kithi lapha ubusika buqala besingasela manzi emadamu lemachibini aseduze lathi kodwa besesiqalisile ukulima imibhida etshiyeneyo ezivandeni,” kutsho uMnu Msipa.
“Udubo ebesengikhangelane lalo ngolokuswela amanzi okuthelela isivande sami ngakho ngibone kungcono ukuba ngigebhe umthombo lapho okwakulechibi khona njalo nginanzelele ukuba ukugebha umthombo kuyanginceda ngoba ngiyenelisa ukuthelela isivande sami,” kutsho uMnu Msipa.
Uqhubekele phambili uMnu Msipa esithi umlimi uyenelisa njalo ukugebha imithombo esenzela izifuyo zakhe ukuze zithole amanzi okunatha.
Uxwayise abalimi ukuba nxa bengasebenzisa amanzi omthombo kuhle bayenelisa ukufika isikhathi sezulu esizayo belokhe besebenzisa amanzi omthombo.
UMnu Msipa uphinde waxwayisa njalo abalimi ukuba nxa bengagebha imithombo yabo bananzelele ukuthi ivikelekile.
“Umthombo ungagejwa kumele ufakwe izigodo phezulu, lokhu kuzakwenza abalimi benelise ukugcina amanzi amalutshwana agobhozayo okwesikhathi eside.
“Abalimi abanengi abazi ukuba amanzi ayavunwa ngakho lesi yiso isikhathi sokuvuna amanzi ayabe ephansi emhlabathini,” kuphetha uMnu Msipa.
Online Reporter