admin
Johas Moyo
ABALIMI kuleli sebekhuthazwe ukuba benze inhlelo ezitshiyeneyo zokufuya ezigoqela ukulima kanye lokufuya ngoba lokhu kwenza benelise ukuziphilisa phakathi komnyaka.
UDokotela wezifuyo eVeterinary Services uNdabezinhle Mkhwananzi uveze ukuthi ukufuya izifuyo ezehlukeneyo kulakho ukuthuthukisa isibaya sesizwe kukanti ukulima khona kwenza umlimi abe lezinye indlela zokuziphilisa.
Ekhuluma loMthunywa uDkt Mkhwananzi uveze ukuthi abalimi abahlanganisa ukufuya kanye lokulima kabaphelelwa ngamacebo ngoba nxa bengasavunanga lutho emasimini balakho ukuthengisa izifuyo zabo.
“Sikhuthaza abalimi ukuthi bafuye zonke izilimo ezigoqela inkomo, obabhemi, imbuzi, izimvu, ingulube, inkukhu zemakhaya kanye lezesilungu, izagwaca kanye lenkwilimba ngoba konke kuletha imali kubalimi,” kutsho uDkt Mkwananzi.
Uqhubekele phambili esithi abalimi beGwanda balakho ukuthi bangahlanganisa izifuyo kuthi nxa inkomo zingenzi kuhle imbuzi kumbe izimvu kuyenzeka ukuthi zivume kungakho umlimi ubalakho ukuthi aziphilise.
“Sikhuthaza abalimi ikakhulu esabelweni seMatabeleland South ukuthi kabahlanganise izifuyo zabo. Lokhu sekuncede abalimi abanengi ngoba nxa amadlelo enkomo engekho, imbuzi ziyenelisa ukuthi ziphile ngamahlamvu ezihlahla lokho kwenza umlimi engaphelelwa ngamacebo okwenza imali.
“Abalimi kabananzelele ukuthi izifuyo kazidingi ndleko ezifanayo. Ngokunjalo kuyanceda ukuthi ahlanganise izifuyo zakhe ukuze engasweli eziyabe zizenza kuhle ngalesi sikhathi laloba isimo siyabe sisibi ngakanani,” kutsho uDkt Mkwananzi.
Uphethe ngokukhuthaza abalimi ukuthi banakekele izifuyo zabo ngokubona ukuthi zivikelekile emikhuhlaneni ngokuzipha imithi efaneleyo ngezikhathi ezitshiyeneyo.
Online Reporter