admin
YiNtatheli kaMthunywa
ULIZWE Sweswe usethole ‘‘umklomelo’’ okwedlula bonke abaqeqetshi abakuligi yeCastle Lager ngokusebenza kuqembu elilodwa kusukela ngo2010.
USweswe utshayelwe ihlombe kuliviki ngokugcina kwakhe umsebenzi kuTsholotsho FC lapho asekhuze imidlalo efika amatshumi amane. Anduba kuvele ukuthi uSweswe nguye umqeqetshi osehlale leqembu elilodwa okwesikhathi eside, “umiklomelo” lo ubuphethwe nguNation Dube oweHwange FC. Okwamanje uDube usamiswe umsebenzi.
USweswe ungene kuTsholotsho FC ngomnyaka ka2010, wabangumqeqetshi owancedisa ukuthi iZiqholo zeZhwane ukuthi zingene kuligi ephezulu eyePSL ngesizini ka2015. Kwathatha iminyaka emihlanu ukuthi akhulule iZiqholo zichinse ukudlala lengcitshi zenguqu yakuleli.
Ekhuluma loMthunywa ngoLwesibili, uSweswe ubike ukuthi uyajabula ngasekwenzile kuTsholotsho.
“Ngisuka khatshana lethimu le. Ngidumisa uSomandla ngokuthi sengenelise ukuqeqetsha ithimu elodumo ukwesikhathi eside,” kutsho lumqeqetshi.
USweswe ubalelwa kubaqeqetshi ababukhali ekucupheni abadlali abasacathula kumdlalo wenguqu.
Inengi labalandeli bomdlalo limazi engumqeqetshi owayegxile kunguqu yabasakhulayo ikakhulu kumincintiswano yamaYouth Games.
Kodwa, loba uSweswe ehlonitshelwa ukugcina umsebenzi eTsholotsho, isimo esikhangelane lethimu yakhe asijabulisi.
IZiqholo zihlezi ngenxeba budebuduzane lasekucineni kwengalane yeCastle Lager ngemva kwemidlalo elitshumi lanhlanu. Ngesizini ka2015, ngesikhathi uSweswe eyichinsisa ukudla kuligi ephezulu, abafana beTsholotsho basinde kancane ukuphuma kusigaba lesi somdlalo.
Kusenjalo, uSweswe ubike ngokugcweleyo ukuthi uyabadinga abadlali bokwengezelela ithimu yakhe.
Iligi yeCastle Lager iphakathi kwefasitela lokuthengwa lokuthengiswa kwabadlali. Ngesikhathi lesi ngomnyaka odluleyo inkamba yeTsholotsho yayinyakazela ngokugcwala kwabadlali ababefuna ukutshengisela amathalenta kuyo.
Ngaleso isikhathi uSweswe wabikela iphephandaba likazulu ukuba iTsholotsho FC ilabo abadlali abagcwele indawo ezinengi ezibalisa iSouth Africa, iBotswana lakoBulawayo.
“Abadlali abafuna ukuzodlala kithi bakhona. Silabo abaseSouth Africa lakwezinye indawo. Angeke sizihluphe ngokuthenga lonyaka,” kwabika lumqeqetshi.
Ngesizini ka2016 kukhanya iZiqholo zizalandela uhlelo olufanayo ngokungathengi abadlali.
UMthunywa ufike wabukela iTsholotsho ilolonga enkundleni yeWhite City lapho okutholakale ukuthi akula abadlali abatsha abakhonjiswe liqembu.
“Sizenelisa ukuyibamba indawo yethu sidlala kuligi enkulu ngabadlali engilabo,” kutsho uSweswe.
USweswe ucele abalandeli beTsholotsho ukuthi bengadeli ngokusekela iqembu ngalesi isikhathi lapho lidinga usekelo kakhulu.
Online Reporter