Online ReporterEthel Ncube
ABALIMI bezifuyo sebeqalisile amalungiselelo okuyabukisa inkomo zabo kumbukiso weHarare Agricultural Show ozabe ukhona ngenyanga kaNcwabakazi.
Ingcitshi kunkomo zohlobo lweSimmental uMnumzana Obert Chinhamo uveze ukuba inkomo ezizabukiswa sebazikhetha kwezinye ezisesibayeni.
“Amalungiselelo okuthi siyebukisa inkomo zethu eHarare aseqalile. Inkomo esikhangelele ukuhamba lazo sesazikhetha sazivalela. Sizipha ukudla ukuze nxa zisiya embukisweni zifike zizithengise zodwa emehlweni kazulu ozabe esemcimbini lo.
“AmaSimmental avele kawadubi, okwakho yikuzipha ukudla lamanzi lokubona nje ukuba ziyadla zisuthe,” kubika uMnu Chinhamo.
Uqhubekele phambili eveza ukuba inkomo kumele zidibhe.
“Inkomo zakho nxa usuzivalele sezisidla zivalelwe akutsho ukuthi akumelanga zidibhe, kumele ubone ukuba ziyadibha ngamalanga azo afaneleyo njalo zithole imithi efaneleyo.
“Nxa uhambisa inkomo zakho embukisweni kumele uzihambise ziqinile,” kutsho uMnu Chinhamo.
Ubuye wakhuthaza abanye abafuyi benkomo ukuthi balungisele ukuya kumbukiso lo eHarare ukuze bayefunda kwabanye abafuyi.
“Njengabalimi abafuyileyo asambeni eHarare siyefunda kwabanye abalimi ukuthi benza njani ukuze baphumelele,” kuphetha uMnu Chinhamo.
