Online Reporter
Ethel Ncube
AKUBIZWA ozwayo eHoliday Inn eMzansi Afrika lapho okuzabe kulomcimbi weMapressa Glam and Fashion Show lapho okuzabe kudingwa ogeze kakhulu wagqoka waphelela okuzamenza azitholele umvuzo.
Umcimbi lo uzakwenziwa ngoMgqibelo njalo kuzabe kulabalingiswa bakaZalo abagoqela uDawn Thandeka King odlala enguMaNgcobo kanye loCebolenkosi Mthembu odlala enguNyawo.
Intatheli ixhumane lomlingiswa kaZalo uCebolenkosi obike ukuba yena ukhangelele ukuya kulumcimbi.
“Ngiyathaba ukuba nginxuswe emcimbini weMapressa Glam and Fashion Show lapho engizabe ngisiyabona khona omama labobaba abahle. Mina sengilungiselele ukuya emcimbini lo ngilinde ilanga kuphela ukuthi lifike lami ngiyejabula labanengi,” kutsho uNyawo.
Ekhuluma lentatheli umnikazi womcimbi uMapressa ubike ukuba ngokokuqala lonyaka ukuba umcimbi uyekwenzelwa kwenye indawo.
“Umcimbi uzakwenzelwa eHoliday Inn lapho okuzabe kulabahluleli beMzansi Afrika abangazi lutho ngabantu abangene kumqhudelwano wokugqoka kuhle ukuze kungabi lomuntu ozathi ubani ukhethwe ngokwaziwa. Umcimbi walonyaka usezingeni eliphezulu kakhulu ngoba siqeda kwenza okweMapressa Glam and Fashion Show kule-After Party, abantu bazahamba bayezikholisela khona. Ngibonge kakhulu kwabancedisileyo ukuba umcimbi lo uphumelele, ngeke ngiqambe abantu bonke ngamabizo. Ziyakhala bomkhaya ngoMgqibelo, asazi ukuthi indondo izakuya kobani, asilindeni ilanga sibone,” kuphetha uMapressa.
