Online Reporter
MAHLABEZULU umhlaba lo awusafani lasendulo kumele sinyathele siqaphele ngoba singekela ukwenzenje sizanyathela ameva ogagu asihlabe thina sisithi sihamba etshebetshebeni.
Endulo abantu babeselatshwa zinyanga eziqinileyo njalo beleqiniso lokuthi bazathola usizo abalufunayo. Abaphurofethi kanye labafundisi bakulezonsuku babethembekile beselapha ngenhliziyo ezimhlophe ezigcwele uthando.
Lamuhla akusekho konke lokhu ngoba inengi lalabo abathi bayelapha sebesenza belengqondo yemali lobugwelegwele kuphela.
Sekumele nxa usiya lapho uhambe uleqiniso lokuthi umuntu okwelaphayo uthembeke okungakanani ngoba ungalala uzangena ezinkingeni ongazaziyo.
Siyake sifunde kumaphephandaba ngabantu abelatshwa ngezinto ezingamazilo zinyanga lezi okubenza bacine belomnyama abangawaziyo ukuthi uvelela ngaphi.
Kambe sibili uyabe usithi uyinyanga enjani nxa uselapha abantu ngegazi labantu abafileyo. Kweyinye ingxenye kulabaphurofethi abalwayo bebanga abantu.
Kambe khona uyabe uselapha na okweqiniso nxa usilwa lomunye ukuba kungani abantu besiya kulowana omunye umphurofethi oseduzane lawe bengabuyi kuwe. Abanye njalo siyake sizwe ukuthi bayalwa bebanga indawo zokuthandazela. Angithi abantu bayenelisa ukuzikhethela lapho abafuna ukuyathola khona usizo.
Lokhu kusegcekeni ukuthi umuntu lo uyabe engelawo amandla eNkosi ngoba uyabe ekhuleka ethembe indawo athandazela kuyo.
Mthwakazi omuhle kumele siqale sikhangelisise ukuthi impilo zethu sizikafa ezandleni zabantu abanjani ngoba kwesinye isikhathi uyacina usulandelwa ngamathunzi ongawaziyo.
Kukanengi sisizwa ukuthi bakhona omama ababanjwa ngabaphurofethi iganyavu kuthiwa bayelatshwa.
Zinyanga labaphurofethi, asithembekeni selaphe uzulu ngendlela eyiyo hatshi ukuqila lokuhlukuluza abantu ngoba bephakathi kwenkinga ezehlukeneyo.
UHulumende wafaka umthetho wokuthi zonke inyanga zibhalise ukuze zisebenze ngokusemthethweni.
Kuyadanisa ukuthi zikhona ezamanga ezibhalisayo zisenzela nje ukuthi zibe zisaziwa emthethweni ukuze zingabotshwa.
Inqobe isala kithi Mthwakazi omuhle ukuthi singazithembi zonke inyanga kanye labaphurofethi ngoba zilamachence ngoba abanye babo benzela nje ukuthola imali ngobuqili.
