admin
Ethel Ncube
UGATSHA lwezemfundo selucebise abaphathi bezikolo ukuthi bangabuyiseli abantwana abangabhadalanga imali zesikolo emakhaya ngoba kulilungelo labo ukuthi bathole imfundo.
Iphephandaba likazulu libikelwe ukuthi abantwana bonke balelungelo lokufunda akulamfundi okumele abiselwe ekhaya kuthiwa adinge imfanelo zesikolo.
UDeputy Minister wezemfundo yaphansi leyaphezulu usikhwicamfundo uPaul Mavhima uchazele intatheli ukuthi akulasikolo esilemvumo yokuxotsha abafundi abangakabhadali imfanelo zesikolo.
“Abafundi bonke kumele baphiwe ithuba lokufunda bengaxotshwa esikolo, okuqakathekileyo yikuthi umfundi abe ekhiphe enye imali yesikolo besekuvunyelwana ukuthi izaqediswa nini. Abazali yibo abolomlandu wokukhumisana umlotha labaphathi kuvunyelwane ukuthi imali eseleyo izabhadalwa njani,” kubika isikhwicamfundo uPaul Mavhima.
Uqhubekele phambili waveza ukuthi abafundi abahlala esikolo labo akumelanga babuyiselwe emakhaya nxa bengaqedanga ukubhadala imali zesikolo.
“Nxa umfundi ebhadele enye imali ithemu iqalisa kumele avunyelwe ekilasini aqhubeke ngezifundo zakhe umzali esadinga enye imali yokuthi abhadale. Ukuxotsha umntwana usithi kayedinga imali kuyamphambanisa kakhulu kucina kubangela ukuthi impumela yakhe yehle ngoba ekhuthe ezinye izifundo,” kubika uSikhwicamfundo uMavhima.
Intatheli ibuye yaxhumana lomunye umzali uNkosazana Primrose Ncube olomntwana ofunda eMatopo High School oveze ukuthi lonyaka abantwana abazange babiselwe emuva.
“Ngiyathaba ngokwenziwe ngumphathi wakulesi sikolo, kwakungelamntwana ongena egedini lesikolo imali yonke ingaphelanga ukubhadalwa izikolo zivulwa, kodwa lonyaka ngenze isivumelwano lomphathi ukuthi imali eseleyo ngizabe ngibhadala ngenyanga ngiqede ithemu ingakapheli,” kuphetha uNkszn Ncube.
Online Reporter