Online Reporter
Sukulwenkosi Dube-Matutu
ABANTU abakhubazekileyo abangu-769 sebeqeqetshwe kuzifundo ze-Information and Communication Technology (ICT) ngenhloso yokubenza babe yingxenye yomhlaba osebenzisa ubuchwephetshe.
Ukuqeqetshwa lokhu kuqhutshwa yiPostal and Telecommunications Regulatory Authority of Zimbabwe (POTRAZ) ngokusebenzisana lezinye inhlanganiso.
Lonyaka abantu abangu-131 abakhubazekileyo sebeqeqetshiwe, okugoqela abangu-29 abavela eMatabeleland South abasanda kuqeda uhlelo lwezinsuku ezine lokufunda amakhono ayisisekelo ekusebenziseni amakhompuyutha eBeitbridge.
Uhlelo lolu luqhutshwa yiPOTRAZ isebenzisana leInternet Society (ISOC) Zimbabwe Chapter kanye leNkomwa Foundation Trust (NFT), njengengxenye yemizamo kaHulumende yokuqinisekisa ukuthi kakho osalayo ekuguqukeni kwelizwe kwezobuchwephetshe.
Kwabanye babafundi laba, kwakungokwakuqala ukuthinta lokusebenzisa ikhompyutha. Uhlelo lolu lwalulungiswe ngendlela evumela abantu abakhubazeke okutshiyeneyo ukuthi bafunde njalo basebenzise ubuchwephetshe ngaphandle kobunzima.
Ekhuluma emcimbini wokwethweswa iziqu ngoLwesihlanu, umsekeli kaMqondisi weUniversal Services Fund (USF) kuPOTRAZ, uMnu Raxon Tichafa Mujuru, uthe inhlanganiso yakhe izimisele ukuqhubeka iphakamisa impilo yabantu, ikakhulu abasemaphandleni lasezindaweni ezisalele emuva.
“Ngokwezibalo zohlelo lolu, abantu abakhubazekileyo abangu-769 asebeqeqetshwe emakhonweni ayisisekelo lalawo asezingeni eliphezulu e-ICT, bevela endaweni ezingu-22 elizweni lonke. Lonyaka kuphela, abantu abangu-131 sebethole ukuqeqetshwa ku-ICT,” kutsho uMnu Mujuru.
Uthe lokhu kutshengisa intuthuko ekwakheni ilizwe lapho abantu abaphila lokukhubazeka bengasebenzisa khona ubuchwephetshe ukuzithuthukisa kanye lokuphucula impilo zabo.
Uphinde wakhuthaza abaqede ukuqeqetshwa ukuthi basebenzise ulwazi abalutholileyo ukuzidalela amathuba okuziphilisa kanye lokuzimela emphakathini.
UMnu Mujuru uthe ukuqeqetshwa kuphela akwanelanga, kodwa kumele kusekelwe ngokutholakala kwamakhompuyutha, ubuchwephetshe obulungele abantu laba kanye le-inthanethi ethembekileyo.
Ukuqinisa lolu hlelo, iPOTRAZ isisabalalise amakhompuyutha angu-857 ezikhungweni ezingu-94 ezinakekela abantu abakhubazekileyo elizweni lonke.
“Lokhu kuzakwenza ukuthi abantu abakhubazekileyo baqhubeke bezijayeza amakhono abawafundileyo njalo bethole amathuba okusebenzisa ubuchwephetshe emiphakathini yabo,” kutsho uMnu Mujuru.
Loluhlelo luyingxenye yemizamo yokwenza ukuthi abantu abakhubazekileyo babe yingxenye epheleleyo yomnotho welizwe osekelwe kubuchwephetshe ngokwandisa amathuba okufinyelela ku-ICT, ukuqeqetshwa kanye lokuxhumana nge-inthanethi.
